HNB maczım lu turgomo dsim mi karkhutho d’Södertälje

SÖDERTÄLJE – İ karkhutho d’Södertälje du Swed bi methcadronutho du şutoso d’ABF, mtayablın 9 Odor u yawmo Tibeloyo da Neşe bu bınyono di karkhutho. Li hfituthathe’ste, maczamwo mşale d’hudre u şutose frişe; beynothaye i mşalonitho d’HNB bu Swed Filiz Bısseh wi hadımto du Mawtbo d’HNB Ayfar Gabriel. Bu turgomano dsim, kle cali tarbitho da tloye, calu cnufyo ğensoyo wa şwole u qetre dkito bi karxutho.   

Bıthır ma mamle dsimi’ste, mdaşın u şukono di şawyutho da 2023 mi sfaryawmo di karkhutho, mi karkhutho umu polisayda. U şukonano kmidaşın kull şato l’noşo aw şutoso dhawile tacbo b’haqlo du kenşo wu adşato’ste, hiw u şukonano lu tukoso d’Mamma United dıkfolıh leşan u snodo da emotho dqudri dım’athri a haye d’ruhaye uda nacimathe l’cyeşe tawtır u dhowe mlahmonutho bgawe du kenşo.   

Me gabo hreno a hadımyotho d’HNB b’Giessen u bı Swisra, kımtaybi ruhaye la hfitwotho dgısaymi ramhıl 11 bu yarhano bi ohnutho d’8 Odor. B’Giessen gıdmisım meeting dımaczım ele farsufe u folitiqore frişe dgımahkın calu maşıqlo u calu dawro di athto bgawe du kenşo.   

Bı Swisra gıdmisım bcayni yawmo hago bu salon d’Royal Palace b’Winterthur u maczımi a zamore Sargon Gawro u Musa Tan dımbasmi lebe da hadire bu zmorathe u basimo.

Bu Swed u b’Beljika’ste, gıdmitayıb turgomo bi cohnutho du yawmo Tibeloyo da Neşe 8 Odor. A mtaybone da hfitwothani d’HNB’ste ksaymi qroyto lu camaydan dmıştawtıf u dmahwe i awyutho wi calaqayde lu yawmano.