05/06/2025

Amerika mahitla mnoco calu cboro d’came me 12 athrawotho

U rişono d’Amerika mdele amro hatho, dımonıc ebe a bnaymothoye d’12 athrawotho frişe dbritho, dcubri lan arcotho d’Amerika. Beyn dan athrawothani kito, Afğanistan, Myanmar, İran uğer. Calu mnocano dgımşare me yawme d’Tre dothe, Donald Trump mırle; Klozım dsamno harake, leşan dımhafadno Amerika, u camayda wi mşaynuthayda.

05/06/2025

WASHINGTON — Yawme d’Tre dıbqamuthayna, gıdmşare u fusqono hatho dımdele acle u rişono Amerikoyo Donald Trump, leşan dmımnoci a socurwotho wu cboro da came dan athrawotho d’Afğanistan, Myanmar, Tchad, i qutnutho d’Kongo, Guinea, Eritrea, Haiti, İran, Libya, Somalia, Sudan u Yemen. Camani’ste mahıt tedbire cala bnaymothoye d’7 athrawotho hrene dkıtne; Burundi, Kuba, Laos, Sierra Leone, Togo, Turkmenistan u Venezuela.

Lfuth u Qusro Heworo, bu fusqonano kobıc u rişono Amerikoyo dmafıt la haye a şudoye dhuwole bu zabno di kampanyayde u dmırwole; Xıd rişono d’Amerika klozım dsamno mede leşan dımhafadno cali mşaynutho athronoyto ula yuthrone dkıtla Amerika. U Qusro Heworo mawdacle’ste du rişono Trump mıdle u fusqonano baroyo bıthır mu hçomo dsımwo yawme d’Huşabo dşafıcina cal taglitho dsimowa b’Colorado.

Trump meqım’ste mawdacwole dgımaqşe u duyoqo da socurwotho l’Amerika, elo u hçomano malızle calu fusqono dkıtwole Trump. 20 bu yarho d’Konun u haroyo, mdewole Trump cal mınyono dfuqdone wu huwo amro la dairat di mşaynutho dımtaybi lohitho d’ışmone cal athrawotho dkibın dımşakli qento l’Amerika.