100 claymotho gıdmıştawtıfi la haylawotho da pwelıs gawoye di fnitho d’Şigur

100 claymotho Ezidoye dmaxlaswolın mu tukoso marıhbono dı Dacış, gıdmıştawtıfi la haylawotho da pwelıs gawoye di fnitho d’Şigur bu garbiyo du Iraq.

 Lfuth u qyomo dımde bayn d’Boğdod u Arbil, 2500 pwelıs Yezidoye gıdmaydi i wolitho di mşaynutho gawoyto d’Şigur.

 Lfuth uqyomo dımdewo beyn di şultonutho du qlimo d’Kurdistan du Iraq u di şultonutho qentrunoyto d’Boğdod, 100 claymotho Ezidoye gıdhowın falqo mu haylo da pwelıs gawoye dıgsaymi u duyoqo di mşaynutho d’Şigur bu garbiyo du Iraq. Holucdo, 8.600 barmothoye d’Şigur mqadamlın talabe dmıştawtıfi la hayle da pwelıs Iraqoye dıgsaymi i mşablonutho di mşaynutho gawoyto d’Şigur.

Lfuth u qyomo beyn d’Boğdod u Arbil, kmıntır dmibayın 2.500 pwelıs Ezidoye, beynothaye kito alfo barmothoye d’Şigur u 1.500 hrene Ezidoye gıdminaqın ma maşıryotho da galwoye dkıtne b’Nuhadra. Wa ışmone da farsufani gıdmiqaydi mi mdabronutho gawoyto d’Şigur. (H)ala (H)ırdo dkıtyo Ezidoyto dmaxlaswola me Dacış, bi maqırhonuthayda mırla; Mqayadli ışmi leşan dmıştawtıfono la hayle  da pwelıs d’Şigur. Bı yawmo ma yawme kıtwoli hulmo dtıcnono zayno, u dsaymono i wolithaydi bu sutoro du athraydi.

Bebzabno, Dalsuz Mustafa dkıtyo hiyaste Ezideyto dmaxlasla me Dacış mırla; Kibe dminaqina mi şultonutho d’Arbil yaste mi şultonutho d’Boğdod. U mede ulsoyo leşanayna ahna dmaxlaslan me Dacış dsaymina mede lu camaydanyo. Babo dı clamtho Ezidoyto dmaxlasla me Dacış mırle; Mede towoyo dmıştawtıf claymotho dmaxlaslın me Dacış la pwelıs d’Şigur.

Camgabıdathe, u qaymaqam d’Şigur Mahma Xalil bi maqırhonutho dhuwle  mawdacle b’surhobo gıdmiqaydi anışmone d’alfo pwelıs me Şigur u ma maşıryotho da galwoye, bnişo dsaymi u sutoro di fnitho u hedora. Holucdo latyo idico ema u hayko gıdmitahwe droşe folhoye la Ezidoye, bnişo dmidarşi xıd powelıs u dmaydi wolithathe bi mşaynutho gawoyto d’Şigur.