Amerika mahıtla tedbire cal Turkiya

Bi maqırhonutho dıfriso mi wazirutho di baroyutho d’Amerika makıd, d’Woşington mahıtla tedbire cal Turkiya bu taro du qyomo d’KAATSA-231

 Bi maqırhonuthathe dıfriso athmıl bi rişonutho d’Mike Pompeo mawdıc, Amerika mahıtla a tedbirani calu şutoso dmarkawla i şultonutho d’Ankara, leşan u teqwiyo du endustri di mşaynutho athronoyto d’Turkiya.

Lfuth i maqırhonutho dfriso mi wazirutho di baroyutho d’Amerika, mahıt athmıl tedbire calu şutoso-Savunma Sanayii Başkanlığı-awkith u şutoso mdinoyo dmarkawla i şultonutho d’Ankara leşan u teqwiyo du endustri di mşaynutho athronoyto u dıkhoyır calu sistem du şuşoto du teknoloji folhoyo.

A tedbirani mahti lfuth u mluwo da 231 du qyomo d’CAATSA, mqabıl di şırke rişoyto d’Rusia dıkmzabno zayne. Wu Turkiya zwınla u sistem da soruhe d’S-400 mi şırkathe i Rusoyto. Bu taro di maqırhonutho du tedbirano dmahıtla Amerika cal Turkiya, mnic kull sohdutho du zebono d’zayne lu şutosano d’Turkiya u maçmıdi a zuze ulıkmitahwe viza lu rişono du şutosano Dr. İsmail Demir uğer mşale.

Bi maqırhonuthathe di wazirutho di baroyutho d’Amerika mawdıc; d’Woşington bşıkıl qriho u ftiho ğalabe naqlat grışwola u zuhoro d’Turkiya, dkıtyo saqıbloyto lu zwono du sistemano d’S-400 dıkmşakıl qento li mşaynutho d’Amerika ulu teknolojiayda da zayne. Elo Tukriya naqla hreto, fsıqla d’zawno u dımçarbo u sistemano d’S-400 dkıtyo’ste qento rabo la zayne ula tayosyotho du huyodo du NATO

Calathe mid fusqono, dmitawfıqo Ankara mu ittifaq mşawtıfo dkıtwo cali tahrazto da tayosyotho d’F-35. A tedbirani dmahti ucdo cal Turkiya, egartho qrıhto’yo d’Amerika hadırto’yo dımafito la haye u qyomano d’CAATSA kule u dlatla tolerans da hayle bnayqyomayda dhowelın hawxa şıkıl d’esore cama şutose Rusoye.

Pompeo tlıble’ste me Turkiya baroyo dımsafyo u şwolano du sistem d’S-400 bu kordinasyon dıklozım dhowela cam Amerika. Kmo şoce bıthır mıd mawdıc u fusqonano d’Amerika, mahwela Turkiya hfuxyo u mawdacla dgıtulyo u hayif. Bebzabno u waziro di baroyutho du İran’ste mawdacle ilo thnihuthayde cala tedbirani dmahti cal Turkiya.