Amerika mahıtla tedbire calu mathlono du İran b’Yemen

Amerika, mahıtla tedbire calu mathlono du İran b’Yemen, bnişo dmitaqşe u hboso cala hayle da Houthiye, leşan dmaklın u qrobo dkı mdawım hani 5 eşne b’Yemen.

 Bebzabno Woşington, mahıtla’ste tedbire cal Pakistanoyo dıkhoye bu İran u dıkmıthım bu snodo da hayle d’al Quds du İran.

İ wazirutho di Xazina d’Amerika mahıtla athmıl tedbire di marhıbonutho calu mathlono dilonoyo du İran b’Yemen. A tedbirani mahti cal Hassan Irhu xıd dawse dmitaqşe u hboso cala hayle Şica da Houthiye d’Yemen dımqadmi li tablitho da droşe, bnişo dmitakle u qrobo gawoyo du athro dıkmdawım hani 5 eşne.

Lfuth Amerika u mathlono İranoyo, mşalo ma hayle d’al Quds du İran’yo u huwe’yo dıkhoyır cala hayle du Qawmo du İran wa fulhone dıkmaşe u İran b’Yemen, b’Suriya ubğer dukotho. Camathe’ste i wazirutho Amerikoyto mahıtla i bethsawbo Emwothoyto d’al Mustafa bi lohitho dkımto, cal dıkmıstacmılo hayle nuxroye bu teltimo da mawdconwotho ğnize uba cuqobe.

Camgabedani, i wazirutho di Xazina d’Amerika mahıtla’ste tedbire cal Yousef Ali Muraj dkıtyo Pakistanoyo dıkhoye bu İran u dıkmıthım bu snodo da hayle d’al Quds wa fulhone, a hfitwotho wa hçome dıksaymi bu Madınho Mescoyo ubı Amerika. Bu amrano d’Woşington, maçmıdi a zuze d’Irlu, Muraj udi bethsawbo u mnic dmisım esore Emwothoye acmaye.

A hayle d’al Quds, heş me meqım mahtiwo bi lohitho da tukose marhıbone. Amerika wi Scudiye kımfaşqi a Houthiye d’Yemen, droco du İran u dıkubco dım’athro u qlimo wu rişono Amerikoyo mawdacwole li Scudiye meqım yarho, dgımahıt a Houthiye bi lohitho di marhıbonutho wu fusqonano di Xazina’ste, kmifaşıq xıd zuhoro qaşyo la Houthiye.