Sim hjome qaşye b’Amerika u b’Britania

Adyawma safrayto, sim hjomo barbroyo b’Minneapolis d’Amerika. Bu hjomano dsim bu zayno, qtil farsufo u 11 hrene mjarhi.

 Athmılste qariwo li arişkoyto d’Britania London, sim hjomo bi skino cala mdinoye u qtil 3 farsufe u msik u hayobo. Wu hjomanoste lo mfaşıq xıd hjomo marhıbono.

 Bıthır yarhe dıkımdawmi a tagliyotho mqabıl du polis d’Minneapolis d’Amerika calu qatlo dıha komo, adyawmaste sim hjomo qaşyo bu zayno cala mdinoye. Lfuth i mawdconutho dhuwle u polis, qtil farsufo u mjarıh 11 hrene u baroyo nqili la bethkrihe.

U polis sımleste qroyto lu camo, dlızze li duktho du hjomano elo lo mawdacle, en msıklın noşo dıkmıthım bu hjomano. Bezabno b’Reading d’Britaniaste sim athmıl hjomo bi skino calu camo dkıtwe b’park bu macırbo di mditho.

Bu hjomano dsim, qtil 3 farsufe wu polis makadle dımsıkle u hayobo dkıtwe claymo d’25 eşne. U polis athmıl mawdacle dmıdle i sbuthathe xıd hjomo marhıbono, elo bıthır makadle dımşahlafle u fusqonayde u mabdelın buhone bi sbuthathe.

U rişwazire Britanoyo Boris Johnson frısle egartho bu Twitter u mawdacle u snodayda la yaqrotho da dıbhe u mhanele u polis calu cuqobo dsımle.