Amerika mahıtla tedbire momunoye cal şırak du Sin u d’Rusya

İ şultonutho d’Amerika, mahıtla tedbire momunoye cal 4 şırak d’Rusya u du Sin, dımdawamlın i tagoruthathe camu İran.

 Bebzabno a şırak d’Rusya u du Sin kmıthomo dımcadarlın u İran bi tahraztayde du snoco da soruhe.

A tedbirani d’Amerika mahti cala 2 şırak d’Rusya Nilco Group wi şırke Elecon, wa 2 şırak du Sin Chengdu Best New Materials wi şırke d’Zibo Elim. Bi maqırhonutho dhuwle u waziro di baroyutho d’Amerika Mike Pompeo thımle an 4 şırak dınqilın teknoloji hassas u mluwe l’Tehran leşan dmitıstacmıli li tahraztayda du snoco da soruhe.

A tedbire dmahti calan 4 şırak gıdmdawmi 2 eşne u mnici a şırak Amerikoye dmaşın tagorutho acmaye. Pompeo mırleste; A tedbirani midi bu taro du funoyo dkobina lu İran cala fulhone lo qonunoye dıkmaşe u lıkmaqbılina dğer şırak u athrawotho dfulhi bu haqlano cam Tehran.

İ şultonutho du rişono Donald Trump, mu zabno dıgrişo mu qyomo du nukleer ba 2018, mahıtla şişaltho d’tedbire momunoye frişe calu İran. Wi sbuthathe di kampanyathe da tedbire calu İran, drişoleste Pompeo bu zabno da socurwotho haroye dsımwole lathrawotho frişe du Madınho Mescoyo; beynothaye lu Kuwait u yatiwo camu baramnayde Ahmad Naser al Mohammad al Sabah.