Amerika mawdacla hadırtoyo dmahto tedbire cala farsufe dkıtte methcadronutho camu bethdino d’Den Haag

Amerika gzımla a farsufe dıkfulhi camu bethdino Emwothoyo da hawbe du qrobo Den Haag. Waşington mawdacla, dkıtyo hadırto dmahto tedbire cala farsufe dkıtte methcadronutho camu bethdino d’Den Haag.

 U fusqonano mid, bıthır mıd u rişono Amerikoyo Donald Trump mdewole amro u dımşadarwo li wazirutho di baroyutho du athro.

 A buhone dcala hawbe du qrobo dsimi b’Afğanistan, kibe dothe dmitaklın bıthır mıd Amerika gzımla, dmahto tedbire cala farsufe dıkfulhi camu bethdino Emwothoyo da hawbe du qrobo dkıtyo b’Den Haag d’Hollanda. U rişono Amerikoyo Donald Trump mdewole yawme d’Hamşo dı şafıcina amro bi sbuthathe, mşadarwo li wazirutho di baroyutho du athro.

 U amrano kobe zedqo lu waziro di baroyutho Mike Pompeo, dmaçmıd a zuze dkıtte a farsufani b’Amerika u dlobelın viza lu athro. Mqabıl du fusqonano d’Woşington’ste, u bethdino Emwothoyo İCC mahwele hfuxyo u mırle; U gzomano d’Amerika, lıkmitaqbıl wu athro kımnase, dmahrıw u prensip di kinutho. Bebzabno u mşalo da esore baroye du Huyodo d’Urifi Josep Borrel’ste baroyo mawdacle ilo thnihuthayde u mırle; Hano qedomo dıkxolıq ğamo rabo’yo.

 Borell mırle la gelyunore; Ahna dkıtne bu Huyodo d’Urifi, hadome qawye bu bethdino d’Den Haag’na. U bethdinano kıtle ulsoyutho rabtho leşan i kinutho Emwothoyto wu hkomo da hawbe Emwothoye dıkmisomi. Wa fusqonani du bethdino klozım dmiyaqri man athrawotho kulle. Wi sbutho du qedomano d’Amerika, gıdorşinale me qariwo yawme d’Tre dıbqamuthayna.

 Elo u rişwazire d’İsroyel Benyamen Netanyahu kısonıd u fusqonano d’Trump u mırle; U bethdinano mşahlıf l’bethdino folitiqoyo dkıtyo mqabıl d’İsroyel u Amerika, u kımacmıs caynothe la hawbe dıkmisomi mqabıl di noşutho-xıd mathlo du rejim du İran. U fusqonano du rişono Amerikoyo, mqabıl da buhone dkobıc u bethdino dsoyım cala hawbe du qrobo dsimi beyn da 2003 uholan 2014 b’Afğanistan.

 Beyn da hawbani kito, u qatlo d’mdinoye ma Talibanoye, thome da teşniqe da yasire ba hbuşye di şultonutho uğer hawbe dsımlın a hayle nuxroye wa istixbarat d’CİA b’Afğanistan. U athro dkıtyo hadomo b’İCC, kobıc da hawbani dmimodi li ido b’Afğanistan ulo bu bethdino d’Den Haag.