22/04/2022

AMERIKA: Mqadim rmoyto lu tewlifo calu qtolğenso calan Armınoye, cala Suryoye Oromoye u Yawonoye

Bi rmoyto dımqadmo mi hadımto di kongre d’Amerika Carolyn Maloney umu hadomo di kongre Gus Bilirakis, tlib butçe d’10 milyone dolare leşan u yulfono dcalu qtolğenso dan Armınoye ban 1915. Mawdıc da zuzani tlib bu zabnano du duxrono da 107 du qtolğenso dsımwo calan Armınoye, cala Suryoye Oromoye Kaldoye Othuroye Marunoye ucalu camo Yawonoyo, bnişo dmitahwe yulfono la Amerikoye cala qatle sistematik dsımwola i mamlaxtho Cuthmanoyto aclaye.

22/04/2022

WASHINGTON – İ hadımto di kongre d’Amerika Carolyn Maloney dkıtyo mu gabo Demoqratoyo wu hadomo di kongre mu gabo da Qutnuthoye Gus Bilirakis mqadamlın rmoyto mşawtafto d’snido me 50 hadome hrene di kongre d’Amerika. Bi maqırhonutho di rmoytathe, tlib dmibayın 10 milyone dolare li tahrazto du yulfono di betharke di kongre, bnişo dmitahwe yulfono u droşe calu makthabzabno, calu tathir dtrele u qtolğenso dan 1915 cala came Mşihoye dıkhoyanwo ba thume di mamlaxtho da Cuthmanoye.

Bi maqırhonuthathe Maloney mırla; En dlo yulfina mu makthabzabno, hkimoye’na dımkarır. Hathe’yo i celtho dkıtli şubhoro eba-dımqadamlan i rmoytathe leşan dmitahwe yulfono cala hawbe barbroye u sistematik dsimiwo ban 1915. A 2 Mawtbe di kongre mawdewolın bu qtolğensano u ışqad’ste mawdewole Joe Biden ebe wu ucdo’ste ulsoyo’yo la Amerikoye kulle, dmaydi yulfoni cala hawbe dsimi.

Bilirakis’ste mawdacle du zabno catumo du ğenso du barnoşo-u zabno dhani dudciwo dıkmisım hawxa hawbe barbroye-dfayşi şalye’we u dhuwolın celotho xalye udlo mıcne u trelın da hawbani dımdawmi cala came Mşihoye. İ rmoytathe du talab da 10 milyonani l’zabno d’5 eşne’ne leşan i betharke di kongre dobo yulfono la Amerikoye cala hawbe barbroye dsimiwo cal ba milyone dıbnaynoşo-Armınoye, Suryoye Othuroye Kaldoye Oromoye Marunoye, Yawonoye uğer Mşihoye hrene beyn da eşne 1915-1923.

Bebzabno 24 bu yarhano dkıtyo u duxrono şatonoyo du qtolğenso dan Armınoye, gıdmitayıb hfitwotho mşahılfotho b’mdinotho u athrawotho frişe dbritho. Mathlo b’Stanbul d’Turkiya gıdsaymi an Armınoye şişaltho d’hfitwotho, b’Sidney u Melbourne d’Australia gıdmisım tagliyotho, b’Sau Paulo d’Brazil, cayni mede b’Fransa u b’Southfield d’Michigan d’Amerika’ste gıdmitathkır u qtolğensano.