Amerika mzaharla Turkiya bi sbutho di cito d’Ayasofya

Bu taşroro dcali hirutho da tawdyotho di wazirutho di baroyutho d’Amerika, kmisomo Turkiya sturyo bi sbutho d’Ayasofya ubi sbutho du cameydan u Suryoyo wa came hrene dkıtne Mşihoye.

 Bu taşrorano i wazirutho kımmo; U leşono harufo d’Erdoğan, wi aykanoyutho du qetro da mulkone du camo Suryoyo u da came hrene dlatne Maşılmone, mede mahişonoyo.

 İsbutho du droşo dımabdele Erdoğan bıhaq di cito d’Ayasofya dkobıc samla masığdo cabiro lu taşroro di hirutho da tawdiyotho dıkfırso i wazirutho di baroyutho d’Amerika dkıtyo zuhoro la athrawotho dıkdayşi a zedqe di hirutho di tawditho.

Bu taşrorano dıfris me hatho kmitawmır u droşo dkowe me Erdoğan dkobıc mşahlıf i aykanoyutho ruşmoyto d’Ayasofya u Kariya me Bethcatiqotho lı Masığdo, wu lo teqbilo di tawditho rabtho da calawiye mede dıktore ğamo raboyo.

Bu taşroro kmitawmır me gabo Erdoğan khodır bu futoho du tecmiro di cito Suryoyto Ortoduksoyto, u me gabo hreno kobıc dımşahlıf i cito d’Ayasofya lı masığdo, mışkıl kibe howe hawxa siyase. Dilonoyith bu zabno haroyo u leşono harufo dıksaymo Turkiya mqabıl da Yudoye , u dıkmisim haqara mqabıl da tawdiyotho latyo mede dkibe dımdawım elo klozım miqafele şroyo.

Hıdo ma nuqtotho hrene dıkmıgrış u zuhoro acla bu taşroro di baroyutho d’Amerika i sbutho da mulkone du camo Suryoyo u da mşihoye hreneyo. Bi sbuthathe bu taşroro kmitawmır ba ışne haroye i şıltonutho d’Turkiya mahıtla ido cala mulkone da Suryoye, u hın maniste ba ışne kımdawmi a dacwat dkito, wi şıltonutho lıkmıhalqo dawse lu şroyathe. Me gabo hreno du şutoso d’Unesco hule maqırhonutho bi sbutho d’Ayasofya u mırle; Turkiya dılo mu xabreydan u mu fsoso dobina layba mşahılfola lı masığdo.