Amerika mzaharla u Iraq dlızowın zayne aw lojistik fulhoyo me Rusya

Amerika grışla u zuhoro du Iraq u mawdacla, dkıtyo hadırto dmahto tedbire acle en dothe d’zowın zayne u lojistik folhoyo me Rusya.

 Waşington mqadamla u zuhorano l’Boğdod, bıthır mi socurutho dsımwole u waziro di baroyutho du Iraq Fuad Hussein l’Mosko meqım yarho.

U mcadrono du mşalo Amerikoyo dcala sebwotho folitiqoye u folhoye Clarke Cooper huwle maqırhonutho la gelyunore u mawdacle, d’Amerika grışla u zuhoro du Iraq u mawdacla, dkıtyo hadırto dmahto tedbire acle en dothe d’zowın zayne u lojistik folhoyo me Rusya.

U zuhorano d’Amerika li şultonutho d’Boğdod athi lu hwoyo, bıthır mi socurutho dsımwole meqım yarho u waziro di baroyutho du Iraq Fuad Hussein l’Mosko. Cooper mırle; En dothe u Iraq d’zowın zayne u lojistik folhoyo me Rusya, kito gado ğalabe rabo dmahto Waşington tedbire casye acle.

Cooper huwle mawdconutho calu qyomo d’CAATSA dımdewo ba 2017, dıkmadıl cala tedbire momunoye dkiba Amerika dmahto calan athrawotho dkubci zawni zayne u lojistik folhoyo me Rusya u mu Sin. Bı knuşyo mşawtıfo dsim lu tboco froso b’Mosko, Fuad Hussein u baramnayde u Rusoyo Sergej Lavrov makadwolın, bu zabno du waziro du sutoro du Iraq dgısoyım socurutho l’Rusya, gdurşi a detaje du zebono d’zayne lu Iraq.

Bu mamlayde Hussein mawdacwoleste, d’Rusya u Iraq gıdmodın 14 tahwiyotho d’methcadronutho dbeynothaye bu haqlo du industri du nafto u du ğaz, du hulmono u di tagorutho. Bi ytawtatheste diqowa isbutho di methcadronutho folhoyto beyn da 2 athrawotho, elo a detaje fayişi li socurutho du waziro du sutoro du Iraq. Amerika heş kdurşo amkone du tehito d’tedbire cal Turkiya bıthır dızwınla sistem d’soruhe S-400 me Rusya.