U kıthowo Suryoyo kmıştawtıf li methhawyonutho emwothoyto du Iraq

U kıthowo Suryoyo kmıştawtıf bşıkıl dıkgorış u zuhoro li methhawyonutho emwothoyto du Iraq dcalu kıthowo dıkmitaybo ucdo bi mditho d’Boğdod.

 Bayn da kıthowe Suryoye dıkmıfrosi bi methhawyonuthathe, kito mimre, masırho, surgodo marduthoyo u leşono Suryoyo.

 U rişwazire du Iraq Mustafa Alkazimi, athmıl sımle u futoho di methhawyonutho emwothoyto du Iraq dcalu kıthowo, bi mıştawtfonutho d’zıd me 300 şutose du tboco froso dkıtne m’21 athrawotho Caraboye u nuxroye. Lu futoho di methhawyonuthathe dıkmitaybo bi mditho d’Boğdod, mıştawtafleste menyono celoyo d’nahire u amnore Iraqoye.

İ methhawyonutho emwothoyto du Iraq dcalu kıthowo, gıdfıtho a tarcayde la socure hul u siqumo d’19 bu yarhano awkith gdımdawmo l’11 yawme.

U mede dıkgorış u zuhoro u kıthowo Suryoyo yo dhathe i naqla qamaytoyo dıkmıştawtıf li methhawyonutho emwothoyto du Iraq dcalu kıthowo. İ mıştawtfonutho du kıthowo Suryoyo athyo luhwoyo bu insiyativ du huyodo da sefre u da kothube Suryoye dıfrısle menyono mu produkt dkıtle, baynothaye i mğaltho d’Safrutha, i mğaltho du kothubo Suryoyo, leksikune Suryoye, buhone dıkmo lumode cali sefroyutho Suryoyto, mimre Suryoye mu cadcido d’Bardisan, Antolojya du mimro Suryoyo, kıthowe du masırho u du leşono Suryoyo, u surgodo marduthoyo u ğer.