Amerika tlıbla mi şultonutho d’Suriya dmınco u cboro da marıhbone jihadist la fenyotho du taymno d’Suriya

WASHINGHTON —U waziro di baroyutho d’Amerika Marco Rubio tlıble mi şultonutho d’Suriya dmınco u cboro da marıhbone jihadist la fenyotho du taymno du athro, bıthır ma gedşe du cnufo umu qtolcamo dhawi bhaq da Druz d’Sweda bi şabtho dşaficina. 

Rubio bu buyono dıfrısle bi dafayde d’X mırle “ida di şultonutho dı Darımsuq kıbco dnıfqo moro lkul aftho dhuyo Suriya athro mhaydo u kamilo u mşayno, klozım dımcadro bu tetimo du haşano, udmıstacımlo a’haylawothayda di mşaynutho laşan dmınci u tukoso dı Dacış wa jihadist barbroye hrene dcıbri lu taymno du athro, udsaymi qtolcame”.

Rubio mawdacle ste d’Amerika ba tlotho yawme dşaficina mıştacela dawro rabo ba n’esore dhawila cam İsroyel, cam Yurdnon ucam Darımsuq, bi sbutho du qento uda şuşote mahişone dhawın bu taymno d’Suriya. Callathe, Rubio sımle qroyto li şultonutho d’Suriya dmaydo hşowo mkul farsufo dsımle gunhe barbroye, udmiqadım li kinutho, baynothaye a’haylawotho di mşaynutho dı Darımsuq. 

Camgabıdathe, u mathlono d’Amerika b’Suriya Tomas Barrak sımle qroyto li şultonutho dı Darımsuq d’obo aftho la qalilwotho dmıştawtıfi li şultonutho, udmisım u sutoraththe. Barrak mawdacle ste di şultonutho dı Darımsuq ktıcno i mşalutho u gıdmimıd mena hşowo mqabıl da du mede dhawi bu taymno d’Suriya.