Amiro da Druz Alatraş sımle qroyto dmitakılyo i şalqa du cnufyo mtakso dıkmisomo bi hiğmonutho d’Sweda

SWEDA Suriya— U amiro da Druz Hasan Yahya Alatraş wu hfito bu haqlo kenşoyo Xaled Jammul, bi qroyto msarhabto dsımlın, mawdaclın dıshifi mdinotho u qıryawotho uba n’alfowat d’yaqrotho mgalwelın bi netiçe di mwatyutho folhoyto qşitho dkito bi hiğmonutho d’Sweda. Bu zabno du kenşo emwotho u qlimoyo lıksaymi ulo mede laşan dmitaxılsi a’mdinoye dfayişi dlo bote udlo muklo udlo Samone. 

Alatraş u Jammul bi qroytaththe mawdaclıns ste di mditho d’Swed wa qıryawotho d’hedora, haw fayış ebaye şartat asasi da haye, bi netiçe du ambargo uda hçome dkımdawmi aclaye, u mathkarlın ste dlayto ulo nuqazto du thumo dkibe bu darbayda dmitacbıri a’mcadrınwotho noşoye udu hulmono b’şıkıl mşayno u msarhıbo. 

Callathe, i qroyto tlıbla dmıftıh nuqazto noşoyto bi rocyutho d’Emwotho Mhaydotho cala thume bayn d’Sweda u Yurdnon, bnişo dmitacbıri a’konvoye di mcadronutho la fenyotho dkıtne b’haşo rabo bi mdabronutho d’Emwotho Mhaydotho. 

Alatraş u Jammul bu huthomo di qroytaththe, makadlın da came u madhahbe mşahılfe d’Sweda ksındi hdode ukmahti ido bido mqabıl di şalqa du hçomo barbroyo, u sımlın ste qroyto lkul man dkıtyo mord d’wujdan hayo bıbritho dmaxlıs a’mdinoye meqım mıdşofıc u zabno. 

M’gabo hreno, ba casrowat d’hfite bu haqlo du kenşo mdinoyo u gelyunore, mtayablın athmıl bi mditho d’Qamışli b’Suriya taklitho du protesto xıd snodo la debhe da gedşe admonoye haroye dhawın bi hiğmonutho d’Sweda. 

A’mtakılyone ba mamle dsımlın, makadlın dıklozım dmitatım u cnufyo, u sımlın qroyto lu diyalog ulu şlomo, ukalın cali ulsoyutho di ciyeşe mşawtafto bayn da came d’Suriya wi ulsoyutho dmisım hboso emwothoyo, laşan du sutoro da mdinoye udmınfıq mqabıl du şğuşyo.