Amnesty İnternational, mawdacla da gedşe haroye dhawın bi fnitho du sforyamo d’Suriya gunhe du qrobo ne, u matcanlaste i mdabronutho hathto dı Darımsuq i mşalutho du şğuşyo admonoyo dhawi bi fnitho

I mtakasto emwothoyto du şbuqyo Amnesty, bu taşroro dıfrısla athmıl mawdacla da milişyat dkıtne noqufe di şultonutho d’Suriya qtilın zıd m’100 farsufe bi mditho d’Banias bu sforyamo bu siqumo d’8 u 9 bu yarho d’Odor dşaficina. 

Lfuth i mawdconutho dmatilayo Amnesty, kito 32 gedşe d’qatlo dım’akıd dsimi bidactho dilonoyith bhaq di qalilutho da Callawiye, wa sohude di cayno makadlın l’Amnesty da grube mzayne kımşayliwo a’debhe cali hiyoyuthaththe in dkıtne Callawiye aw lo meqım mu qatlaththe. 

Camgabıdathe, Amnesty mawdacla di şultonutho dı Darımsuq çbırla a’yaqrotho da debhe dımcafın a’qtiloyaththe bı bethıqbure mkanşe, ululalın fsoso dsaymi zawhe tawdithoye aw çınnazat gawonoye, wu medano lfuth Amnesty dyoşo la zedqe da debhe uda yaqrothaththe yo. 

I notrathrozo gawonoyto d’Amnesty Agnes Kalamar bu taşroro dıfris mawdacla du şıklano du qatlo dsim bidactho kşowe l’gunhe du qrobo, usımla ste qroyto dmimıd hşowo ma mşale dcalu qtolcamano u barbroyo. 

Kalamar makadla ste du viyoco di kinutho kibe dmadcır Suriya l’şalqa hathto du texiro du admo, u tlıbla dmisım buqore şarye u m’athrone cala gunhani dsimi bu sforaymo d’Suriya. Kalamar tlıbla ste dmisım u garanti dlımitahwe la farsufe dsımlın hawbe u dyoşe bhaq da zedqe noşoye woliyotho ruşmoye, bnişo dlımitahwelın mkono dsaymi tekrar a’gunhaththe. Bebzabno, i mşalonitho emwothoyto tlıbla dmiqadım tezminat la yaqrotho da debhe du sforyamo d’Suriya, udmitahwelın iqoro bu tewdico di şrolutho du mede dhawi ba fenyothaththe.