Swed mşadarla tayosyotho Gripen l’Polonia

SWED – U waziro di baroyutho du Swed Pol (Pål) Jonson mırle; İ wolitho da folhe uda tayosyothani du Swed, latyo fşıtto u kiba qento. Elo ono m’akdono, da folhaydan hadire’ne lhawxa wolitho. Bu dumyano, kiban dobina signale qrihe l’Rusya dkıtna hadire dımdafcina a thumaydan u dlobena aftho u dmazıcina Mosko mu plan dhçome calan athrawotho hadome bu NATO.

U mamlano du waziro, cala 300 folhe u tayosyotho du qrobo d’Jas Gripen dmatın l’Polonia’yo. Bu zawho ruşmoyo dsim bi foqudutho d’Malbork b’Polonia u dhadırle u waziro du sutoro du Swed’ste, maslımo i mşalutho da folhe uda tayosyothani lu duyoqo du NATO bnişo dmaydi duktho bu duyoqo di mşaynutho da thume oyaroye mqabıl da gzome d’Rusya uda droşe folhoye dıkmaşyo bu yamo.

A tayosyothani du Swed gıdmhalxi bıthır mucdo calu amro du NATO u gıdsaymi u sutoro da tayosyotho uda sfinotho dıknuqli zayne l’Ukraina. Wu nişo du fulhonano dışme; Enhanced Air Policing, dmisım’ste u sutoro da thume oyaroye du NATO’yo u gıdmşare bu zabno du qaytano dothe.

U waziro du sutoro d’Britania Lord Coaker’ste bu mamlo dsımle bu zawhano mırle; U Swed, Polonia, Britania wa hadome hrene du NATO mahwelın bu fulhonano d’adyawma, dlıkfayşina cal idothayna u fothayna elo mhayde’ne ba zedqe dıkmdafcina. U Swed cabırwo xıd hadomo lu NATO 7 bu yarho d’Odor da 2024 bnişo dqodır u athro dmaqwe i mşaynuthayde udu huyodo du NATO.