Amnesty International tlibla me Ahmad Alşarıc dforis i netiçe kamılto da buqore cala gedşe du sforyamo

BRITHO — İ qroyto d’Amnesti athyo luhwoyo meqım mdımqadmo i sictho dkımcaqbo i şrorutho dımşatsowa 9 bu yarho d’Odor dşaficina, i netiçe da buqore dsımla bi sbutho da gunhe du qatlo da mdinoye dhawınwo bu sforyamo du garbay macırbo d’Suriya. 

İ tahlufto di mdabronitho qlimoyto du madınho mescoyo udu garbiyo d’Afriqya d’Amnesti Krestin Bikirli mırla “klozım u rişqutno Ahmad Alşarıc dhowe b’fusqono kamilo dforıs i netiçe kamılto da buqore dsimi bhaq du qtolcamo dhawiwo cala Calawiye mdinoye bu sforyamo d’Suriya, udsoyım u garanti dmiqadmi a’mşale da gunhani li kinutho”. 

Bikirli makadla ste u zedqo dkıtlın a’debhe wu ray gawonoyo dhowelın mawdconutho cali tahrazto da buqore ucali netiçe di sictho. 

Bikirli mırla ste “a’yaqrotho da qtiloye wa farsufe dmaxlaslın kıtlın u zedqo dıdıdci mın hawi, manyo u mşalo u mınne a’tedbire dgıdmaydolın i şultonutho. Balhude a’buqore şarue u şafye hınnene dkibın dıtıfki u maşıqlo laf botaydine dıkmisomi b’kinutho”. 

İ mşalonitho emwothoyto tlıbla ste mu rişqutno d’Suriya dsoyım u garanti dmiqadım tezminat kamile la debhe ula yaqrothaththe, u mamtela lubolo u şudoyo dhuwole Alşarıc dgıdmimıd hşowo ma hayobe.