10/08/2020

Amşihoye khoyın bzuctho b’Turkiya cal dqaşyo i tuxmonoyutho

İ mğaltho Amerikoyto d’Politiko, mawdacla da Mşihoye dı Turkiya krığşi ucdo bu dyoşo, ba rdufye u ba tehdide bu zabno dzayıd u froso di tuxmonoyutho mothonoyto Turkoyto bi netije di siyase Maşılmonoyto dkımmaşela Erdoğan.

Bu taşroro dıfrısla i mğaltho d’Politiko, mawdacla du şuhlofo d’Aya Sofia l’masığdo, kımmathıl i dawse tuxmonoyto harayto dımhalqola i şultonutho d’Erdoğan.

İ mğaltho Amerikoyto d’Politiko bu taşroro dıfrısla mırla “i zuctho bayn da Mşihoye dıkmidoşi du şroro bı Turkiya, kul dkothe kzaydo bu zabno dıktofık Erdoğan lafqıddam i siyase tuxmonoyto mothonoyto. Laşan amşihoye dı Turkiya, u fusqono du şuhlofo d’Aya Sofia l’masığdo kımathıl darbo hreno lu kenşathe dkıtyo du şroro dişo”.

Bebzabno, i mğaltho Amerikoyto mawdacla du muzoğo gawonoyo tuxmonoyo dı Turkiya ktore amşihoye du athro dhoyın bi lothnihutho, ubebzabno kıtlın zuctho rabtho dhowe krize bayn da mazhabe bıthır mıdımşahılfo Aya Sofia l’masığdo.

Politiko mathkarlaste du şuhlofo d’Aya Sofia balhude i dawse tuxmonoyto haraytowa dımhalqola i şultonutho Maşılmonoyto d’Erdoğan.

Lfuth u taşroro d’Politiko, aqalilwotho Mşihoye kule wa culmoye latne fsihoye, ukrığşi bi zuctho, u hın ma clayme Mşihoyeste kmıftakri dıtorın Turkiya udımgalwın la nathrawotho macırboye.

Erdoğan hani zabno yarixo kmıthım dkımmaşe siyase dkıtyo xlıto bayn di Cuthmanoyto wi Maşılmonutho, u bebzabno kımnase dmıstacmıl aqalilwotho tawdithoye xıd debho d’furqono, bnişo dxolıq celotho li siyasayde dlatyo makışronitho.