Antonio Guterres sımle socurutho li bethcatiqotho athronoyto du Cıraq dkıtyo b’Boğdod.

BOĞDOD – U notarozo gawonoyo d’Emwotho Mhaydotho Antonio Guterres, bıthır ma droşe u ytawyotho dhawile cama mşale Cıraqoye, sımle socurutho li bethcatiqotho Athronoyto dkıtyo b’Boğdod; dftihowa me hatho bu yarho d’Odor da 2022 u tamo sımle mamlo la gelyunore.  

Bu mamlayde Guterres mırle; “İ naqa ha dothe li bethcatiqothathe, laybe dlo roğış dkull mede harke mşarewole, u mawlodo di mdinoyutho, harke’yo dıkmıhze i catirutho marduthoyto du Cıraq dhani alfayo d’eşne.”  

Antonio Guterres mırleste; “U mede dhuwle u Cıraq li mdinoyutho uli mardutho dbritho; mede dlıkmitahke’yo. Athino larke leşan dmahweno u iqoradi lani dıkfulhi bi bethcatiqothathe u dımhafadlın acla ba zabne casqe dşafıc u athro ebeye meqım kmo eşne wu husrono rabo dhuwo li yortuthathe.” 

Madcır ba eşnani hol 18 alfo falqe d’athare di mdinoyutho d’Bethnahrin li bethcatiqothathe me athrawotho xıd; Amerika, Hollanda,Yaban, İtalya, Lebnon uğer. Bu tarano’ste i wazirutho di baroyutho du Cıraq, matila athmıl kmo falqe d’athare catiqe dıkducri lu zabno di mamlaxtho da Cabbasoye.