Arbca’ilo (Arbil) mşarela dobo snodo momunoyo la Ezidoye dmaxlaswolın mu qtolğenso dsımwole Dacış aclaye ba 2014

ARBCA’IlO (ARBIL), Qlimo d’Kurdistan bu Cıraq – Athmıl mşarela i şultonutho d’Arbca’ilo (Arbil) dobo 200 alfo dinare du Cıraq lkull Ezidoyo dım’atharwo ma hawbe du qtolğenso dsımwole u tukoso marhıbono d’Dacış aclaye b’Şigor ba 2014. Bi lohitho di tahraztathe di mcadronutho zuzonoyto, kito 3.574 Ezidoye dkıtne ucdo bu qlimo d’Kurdistan, yaste bi golutho.

İ tahraztathe, maqıblowa bu yarho d’Teşrin u haroyo da 2024, bnişo dmısnodi a Ezidoye u mşarela athmıl u gıdmdawmo hol yawme d’Arbco dıbqamuthayna u gıdmifarqo la Ezidoye dkıtne b’Şexan uba mdinotho d’Laliş, Şarya u Khanke ubi qritho d’Derabun. 3 bu yarho d’Ob da 2014, hçımwole Dacış cala Ezidoye d’Şigor.

Ba hçomani a barbroye, qtılwo 5 alfo Ezidoye-nacime u rabe, hol 6 alfo neşe, bnotho u nacime htifiwo wu 400 alfo hrene mgalwewolın ma dukothathe. Mınyono celoyo d’Ezidoye mahzamwolın lu qlimo d’Kurdistan, ğer azzın lan athrawotho şbobe du Cıraq u hrene’ste lan athrawotho du macırbo.

Mani d’htifiwo maxlıs 3.500 Ezidoye wa hrene heş mvayce’ne wi fnitho d’Şigor, heş ba shifotho’yo bıthır mu qtolğensano dsımwole Dacış aclaye. Mawdıc bıgawe du makthabzabno du camano, sim 72 qtolğense cala Ezidoye. Wa hawbani d’Dacış, mawde ebeye me Emwotho Mhaydotho ume ğer athrawotho xıd qtolğenso.