Mtayıb hage u turgome leşan 8 Odor bi Tiçino, Delmenrhorst u b’Hamburg

TICINO, DELMENHORST, HAMBURG – Athmıl dkıtwe u yawmo da Neşe Falıhyotho d’Britho, mtayıb hago mşawtıfo ma hadımyotho d’.HNB b’Ticino camu Hudro Suryoyo du kanton. U hagano dhani zabno yarixo sımwo i hedriyayde, sim u futohayde me Martha Hobel u Aynur Butros, dsımlın’ste a mamle dcali mınce du lalyo bu leşono Suryoyo u İtaloyo.

Bebzabno bu hagano, friş’ste duktho ba mamlani li Sohıdto du Mawtbo Umthoyo d’Bethnahrin İzla Neriman Özgun Rucyo u mahke cala haye ucala fulhone dmaşela b’haqle frişe du ağono umthoyo. Lfuth i mawdconutho dmatilan, u hagano şafıc b’muzoğo basimo wu salon lawğıl u larwal maliwo camo-neşe, gabre-rabe u nacime.

U zamoro du lalyano Sargon Şarro dhadır me Hollanda wi gudo dkıtwa acme bu lalyano mafsahlın a hadire bi musiqi uba zmirotho dımqadmi. Bu hagano’ste mqadamle Kamuran Erbağan u Nabiha Hırmıs myaqronutho l’Xalaf Bandır cal dkull naqla xadomo, tacobo u sanodo’yo la fulhone dıkmisomi ma şutose du camaydan bu kanton.

Me gabo hreno u Huyodo da Neşe u fırco d’Hamburg d’Almanya mtayable turgomo bu salon di cito d’Mor Dimet calu yawmo d’8 Odor. Bu turgaomano camgabe dmahke calu mrodo dhuwlın a neşe bıgawe du makthabzabno, friş’ste duktho li Sohıdto İzla ulu ağono dhuwla eşne yarixe b’haqle frişe.

HNB b’Delmenhorst u b’Genderkeze’ste mtayablın hagono cama neşe da came frişe di fnitho leşan 8 Odor. Bu hagano xıd iqoro li Sohıdto İzla, a mtaybone maklelın a raqde u mafıtlın lalyo şalyo camhıdode.