Arişone du Iraq mcayadlın u cedo di qyamto du cameydan

A’rişone du Iraq udu qlimo d’Kurdistan mhanelın u camaydan bu cedo di Qyamto lfuth u surgodo Grigoroyo. Ba maqırhınwotho dıfrıslın a’rişone du Iraq, mahwelın sabro du cedano di Qymato dhowe aftho li hdoyutho du camo Iraqoyo mqabıl da casqıwotho dkito bu maşıqlano ducdo.

U rişqutno du Iraq Barham Saleh, bi maqırhonutho dıfrısle bi dafayde du Twiter mırle “mu athro da egrotho, da mdinoywotho uda gawne tawdithoye u marduthoye mşahılfe, kımqadmina atahınyothaydan la Mşihoye du Iraq udı britho bu cedo di Qyamto”.

Salıh mırleste “kıtlan sabro di cohnuthathe i mbaraxto du cedo, dhuyo aftho li hdoyutho da Iraqoye mqabıl da casqıwotho dıkloqelın u athraydan, udmitahwe awyutho cama grube du hulmono, bnişo dmisım u sutoro du camaydan mu kewo d’Corona”.

Camgabıdathe, u rişwazire du Iraq dmıstacfele mi wolithayde Cadıl Cabdılmahdi, bu buyono dıfrısle lu tboco froso mırle “kımqadmina a’tahanyothaydan a’Lebonoye la nabne du camaydan ahwotho u ahunone Mşihoye bi ohnutho du cedo di Qyamto. Amşihoye xıd kıtne idice bkul zabno u bkul casqutho, ba yawmaniste kmahwın cama nahunonaththe du athro klayto di hdoyutho udi awyutho”.

Megabo hreno, u rişono du qlimo d’Kurdistan du Iraq Neçirvan Barzani, u rişwazire Masrur Barzani wu rişono du parlamento Qawbad Talbani, ba egrotho dıfrıslın mhanelın u camaydan u Kaldoyo-Suryoyo-Othuroyo bu cedo di Qyamto d’Moran Yeşuc Mşiho, u mahwelın sabro da cede dıbqamuthayna dmicaydi bı fsihutho ubı mşaynutho.