Astrazeneca sımla kontrakt cam athrawotho d’Urifi

I şırke rabtho da darmone bu Swed Astrazeneca, mdela kontrakt rabo cam mınyono d’athrawotho Urifoye.

 Bıgawe du kontraktano, gdımşadro i şırke vaksin, awkith darmono mqabıl di Corona.

Lfuth u ajans da tebe Reuters, u korncern awkith i şırke rabtho du Swed Astrazeneca mdela qyomo, kontrakt rabo, cam athrawotho frişe d’Urifi, leşan dımşadro darmono mqabıl du virus d’Corona la bnaymothoye dan athrawothani.

Mawdıc bu qyomano dımde, kıhobış bıgawe hol 400 milyone vaccin l’Almanya, Fransa, İtalya ulu athro d’Hollanda. U waziro du hulmono d’İtalya m’akadle, du darmonano mawfıq bi bethsawbo d’Oxford wa dozaje qamoye, gıdkumli lu şedoro bi harayto di şatathe.

Işırkathe walaw Swedoyto’yo, elo i şultonutho du athro heş lo mdela qyomo leşan u zwono dı darmono mqabıl di Corona. I şultonutho d’Stockholm mawdacla, dheş kito droşe cam Astrazeneca uğer şırak dıksaymi darmono mqabıl du virusano.

Bebzabno mawdıc, du darmonano di şırke Swedoyto wa darmone hrene, heş latyo idico en gıdmanfıci. Me gabo hreno athmıl mawdıc, belhude ha yawmo nqil 20 farsufe ma haye mu virusano d’Covid-19 bu Swed. Bu şıkılano mati u mınyono da bnaynoşo, dımvayaclın a hayathe mu kewano l’4.874 farsufe.