Athto mu athro d’Mısır Eğuftoyto mnaqyo rişonitho di mdito d’Borlingbrook b’Amerika

Athto Amerikoyto dkıtyo bu şerşo Eğuftoyto mu athro d’Mısır, mnaqyo rişonitho di mdito d’Borlingbrook b’Elinoy d’Amerika.

Camgabıdathe, i naqla qamayto’yo b’Ekwador, dıkminaqyo athto l’wolitho d’rişonitho gawonoyto da powelıs du athro.

 Mari Alexander dkıtyo athto Eğuftoyto mı Mısır udkıtla ğensoyutho Amerikoyto, mnaqyo rişonitho di mditho d’Borlingbrook dıknıflo bu qlimo d’Elinoy d’Amerika, ubebzabno Mari Alexander mnaqyo hdo mbayn da 20 neşe dıbritho dkıtlın bu zuyodo dkulle diloyotho.

Mari bi maqırhonutho dhula lu froshezwo d’Skay News, mahkela cali teşcitho da hayayda u aydarbo makşarla ba fulhonayda bu haqlo kenşoyo b’Amerika. Mari dıqrewola cali gelyenorutho bi bethsawbo Amerikoyto b’Alqahira, hrıgla ste calu yulfono di mdabronutho da şuğlone bi bethsawbo du qlimo dı Tenesi d’Amerika. Ubıthır mıdqayıthla i sohdutho flıhla bu haqlo di mdabronutho di baytoyutho da utele. Mari Alexander dıkcayşo bi mditho d’Borlingbrook mi şato da 2003, hawila fulhone bu haqlo kenşoyo, u mnaqyo hdo ma 20 neşe dıbritho dkıtlın diloyotho bi netiçe da insiyative dmabdela bu haqlo du kenşo.

Mxasra hreto, Tanya Varella i athto qamaytoyo bu makthabzabno d’Ekwador dıkminaqyo rişonitho gawonoyto da powelıs du athro. U rişqutno d’Ekwador bi maqırhonutho dıfrısle bu Twitter mırle “mnaqeli Tanya Varella rişonitho gawonoyto da powelıs d’Ekwador. İ athto qamytoyo dıkmitahwela i wolithathe bu makthabzabno du athraydan, ukıtla şişaltho d’fulhone frişe bu haqlo di mşablonutho da bnaymothoye udu sutoraththe”.

Tanya Varella bi şato dan 1984 mıştawtafwola li bethsawbo da powelıs bi erişkoyto, ubi şato dan1987 mawfıqo mi bethsawbo b’darğo d’rabathhaylawotho.