Aykanoyutho Gawonoyto du Iraq

İ aykanoyutho folitiqoyto, momunoyto u du hulmono bu Iraq kımdawmo dhurwo mi celtho du qrobo mqabıl da ğrobe marhıbone d’Dacış umu virus di Corona dıkmdawım dmibarbız beyn du camo du athro.

Calathe u mawtbo da wazire du Iraq maqbele i rmoyto dımqadamle u Komisyon du Hulmono udi Mşaynutho Athronoyto, dmısxır u athro kule l’zabno d’10 yawme.

Lfuth u Komisyon du Hulmono udi Mşaynutho Athronoyto, u sxoro da dukotho ruşmoye-a dukotho du ltomo du camo uda şutose di şultonutho wu mnoco du nfoqo du camo l’larwal, gıdmşare me 12 bu yarhano uhol 22 bu yarho-xıd tedbire casye mqabıl du pandemi di Corona. U fusqonano mid, bıthır mıd cali u mınyono da bnaynoşo d’tafilın u virusano bu athro. Mu virusano di Corona m’atharle ban 24 şoce haroyani cal 6 143 bnaynoşo u 42 nqili ma haye.

Gawonoyith bu Iraq wu qlimo d’Kurdistan acme, kito hol milyon kayiwe mi Corona u 15 alfo mvayaclın a hayathe u qariwo l’400 alfo qayıthlın u vaksin. Mawdıc’ste d’82 man 400 Iraqoye d’daciri yawme d’Tre mu Hınd, qayıthe u virus di Corona u mahti ucdo bu karanten. A Iraqoyani falohe’ne b’şırak frişe bu Hınd u meqım şabtho grışwo u zuhoro dan athrawotho kulle, dnuqli a bnaymothoyathe mu Hınd, cal di aykanoyutho du hawyo’wa qento.

Bebzabno i bethkrihe d’Ibn al Khatib d’yaqidowa bu yarho d’şafcina mido li ido mu tukoso Amerikoyo d’USAİD leşan dmıftoho me hatho la kayiwe di Corona. Bu yuqdonano mvayacwolın 130 farsufe a hayathe u kulle kayiwe bi Corona. Bi tarmithathe d’USAİD, gıdmitandıfo u gıdmihathıtho i bethkrihe u gıdmişadarla lojistik du hulmono. Calu yuqdonano di bethkrihe’ste adyawma mawdıc, du waziro du hulmono du Iraq Hassan al Tamimi maslamle i isticfayde u mawdacle.

Al Tamimi maklewo mu fulhonayde bıthır mu yuqdono wu bethdino huwole amro dmımsoki u dmitabde buqore cama mşale di bethkrihe. Camgabe da şwolani, a hçome dcala qentrune u nuqazyotho folhoye’ste heş kımdawmi. İ foqudutho Iraqoyto d’Cayn al Asad dkiba folhe Amerikoye mido nişo l’hçomo da soruhe. Hani 3 yawme, hçim cal 3 nuqazyotho folhoye da hayle Iraqoye u Amerikoye. A hayle dıkmısnodi mu İran, kmıthomi bu tuyobo da hçomani. Elo a hayle Iraqoye’ste kımdawmi a cuqobathe cala marhıbone d’Dacış u mawdıc, dmahıtte ido cal ton d’mluwe du syomo da foqucotho bi arişkoyto Boğdod.