Ba ytawyotho di Sunados kmıntır dminaqe fatıryarxo hatho li cito d’Madınho d’Othuroye

Bu yarho d’İlıl dıbqamuthayna, gıdlaymo i Sunados mqadaşto di cito d’Madınho d’Othuroye bi mditho d’Caynkawa bu Iraq.

Ba ytawyotho di Sunados kmıntır dminaqe fatıryarxo hatho li cito d’Madınho d’Othuroye mdarbıd du fatıryarxo dmıstacfele mi wolithayde Mor Gewargis Tlithoyo Sliwa.

İ notarrozutho di Sunados mqadaşto di cito d’Madınho d’Othuroye, frısla buyono la marciyotho di cito, laşan dmitahwelın mawdconutho cala şuşote haroye bi sbutho di qroyto dsımwole i qadişutho du fatıryarxo Mor Gewargis Tlithoyo Sliwa dıtlıbwole dlaymo i Sunados mqadaşto bi mditho d’Caynkawa bu Iraq, bnişo dmigabe fatıryarxo hatho mdarbe, cal du hulmonayde lıkşowe fayış dımdawım bi wolithayde.

Lfuth u buyono dıfris, i qadişuthayde bi lqoyto dhawiwole cama hsayo di cito 23 bu yarho d’Hzirın dşaficina, makadlelın di Sunados mqadaşto dıbqamuthayna gıdmıqtoro hamşo bu yarho d’İlıl di şato da 2021 bu qentrun du kursiyo fatıryarxoyo dkıtyo bi mditho d’Caynkawa b’Arbil.

Ba ytawyotho di Sunados, fatıryarxo Sliwa ruşmoyith gıdmıstacfe mi wolithayde mi celtho du hulmono, ubıthır mathe a’hsayo hadome di Sunados gdımnaqın u fatıryarxo da 122 di cito d’Madınho d’Othuroye.

Lfuth u buyono fatıryarxoyo, mid fusqono dmitasrıh u fatıryarxo hatho bu cedo du Slibo mqadşo dıknofıl yawme dı tre bu siqumo d’13 İlıl dıbqamuthayna bi cito d’Mor Yuhanon Macımdono b’Caynkawa.

Meqım mathe bi şato dşaficina da 2020, Mor Gewargis Tlithoyo Sliwa mbayanwole siqumo laşan dminaqe mdarbe u fatıryarxo hatho di cito d’Madınho d’Othuroye, elo u siqumano mşawharwo cal da hadome di Sunados lıqadriwo dlaymiwo lıhdode mi celtho du virus d’Corona.