Başar Alasad kloqe ucdo i casqutho rabtho dkulle

İ sfaryawmo Amerikoyto The Washington Post, mawdacla du rişathro d’Suriya Başar Alasad, kloqe ucdo i casqutho rabtho dkulle, mu zabno dımşarewole u qrobo b’Suriya bi şato da 2011.

 Bu tebo dfrısla Washington Post, grışla u zuhoro cala qetre dnafiqi beyn di iqartho d’Alasad u Maxluf, calu hrowo du momuno du athro, ucali mwatyutho d’qaşyo beyn du rejim wu barqyomayde d’Rusya.

 İ sfaryawmo Amerikoyto mşamahto The Washington Post bu tebo dıfrısla mırla “u rişathro d’Suriya Başar Alasad kcoyış ucdo i casqutho rabtho dkulle mu zabno dımşarewole u qrobo b’Suriya meqım 9 ışne.

 Lfuth i sfaryawmo Amerikoyto, u hboso da grube mzayne saqıbloye b’İdlıb lıfayış kımmathıl tehdid lu rejim d’Alasad, ube bzabno layto ucdo noşo hadiro dhokım u athro d’Suriya dhani 50 ışne dşaficina kmıhkım mi iqartho d’Alasad, elo aqetre mşarelın ucdo dnıfqi bayn Alasad wa noqufayde dısnıdlın mqabıl di saqıbloyutho, ube bzabno u tboco froso d’Rusya mşarele d’soyım sturyo qaşyo u rejim d’Alasad.

 Washington Post mırla; U mede dkıtyo ulsoytır mu medano, u hrowo du momunoyo dıktofık abnaymothoye Suriye lu darğo di fıqriye qşitho. Ube bzabno lo u athro d’Rusya uloste du İran kıtlın u haylo d’obın milyare dı dolare laşan u quyomo d’Suriya wu bnoyayda. Elo cılmathe Alasad kımdawım drofıd dmisım şuhlofe folitiqoye dgıdfıthi u darbo qum du snodo momunoyo du macırbo udu Xaliç.

 Washington post mawdaclaste dcıl mıdkıtyo ha ma tlotho sahme du cafro d’Suriya latyo bi morutho d’Alasad, elo u protesto hatho dnafıq liholo bi hiğmonutho dı Darca, kmawdıc dkito mkono da fenyotho dıdaciri li morutho d’Alasad kibe dımvayaclın mehatho.

 Me gabo hreno, i rişonitho di tahrazto du madınho mescoyo bu institut Britanoyo da nesore emwothoye Lina Alxatib, mırla; Me beyn da zabne kulle Alasad ucdo bu qento rabo dkulle yo. Alasad latle ruşmoyutho emwothoyto, ulatleste u haylo folhoyo dkıtwoleyo meqım mu qrobo. Ulıfayış bidothe warqe hathe dmıstacmelın”.