Bassam İshaq: u mıştawtfonutho da n’alfowat d’mharbone nuxroye lu gayso d’Suriya tars di siyase d’Amerikayo

WASHINGTON – Bu fuşuqayde li maqırhonutho dhule u mathlono dilonoyo d’Amerika b’Suriya Tomas Barak bi sbutho di şawtofutho d’alfowat d’mharbone nuxroye lu gayso d’Suriya, u hadomo du mawtbo gawonoyo du mawtbo d’Suriya demoqratoyto d’MSD bi mathlonutho d’Waşington Bassam Sacid İshaq mırle “ahna fgicina mi maqırhonutho dhule u mathlono d’Amerika, cal dkıtyo frişto ma klayotho Amerikoye dşaficina dıksaymiwo qroyto dmitawfıqi a’haylawotho nuxroye kulle m’Suriya. U ahna kım’aydinawo i klayto dmeqım d’Amerika”. 

Ishaq bi maqıblonutho dsımla acme i şabake d’Rodaw du tboco froso mırle ste “bebzabno i şultonutho dı Darımsuq kmaqıblo dhowın a’mharbone nuxroye xıd grub ha b’gawıd du gayso d’Suriya, awkith lıgıdmıştawtıfi lu gayso xıd farsufe. Elo ahna bi hzaytaydan klozım a’mharbone nuxroyani dluwelın duktho bu gayso d’Suriya. Bu şuroyo cal dlatne barmothoye Suriye, uda tarteste cal du idyoloji dkıtlın lıgroku b’gawıd d’ha gayso athronoyo mhaydo. Hani latne Suriye wu idyolojiyaththe tawdithoyo tuhmonoyo yo”. 

Camgabıdathe, İshaq mawdacle du qedomo dı Darımsuq la haylawotho d’Suriya demoqartoyto d’QASAD frişoyo mu qedomayda la grube nuxroye tuhmonoye, u hawxa mdawamle “u mede dıkfıhminale mi mdabronutho hathto dı Darımsuq, klozım a’haylawotho d’QASAD lo xıd ha grub elo xıd farsufe dmıştawtıfi lu gayso d’Suriya. Harke khozina dlıkmiqadım b’şawyutho la grube mzayne kulle, elo kmitahwe diloyotho la mahrbone nuxroye, wu medano laşanayna cıjboyo”.