Bi mditho d’Bağdede mtayıb hfitutho catırto laşan u duxrono da 83 ışne du qtolcamo du camaydan d’Simele

Bi mditho Suryoyto d’Bağdede di daşto d’Ninwe, mtayıb hfitutho catırto laşan u duxrono da 83 ışne du qtolcamo du camaydan d’Simele.

Camgabıd da mamle dsimi cali mıcne du yawmano, mqadım ste qole citonoye u qre mimre bat re leşone Suryoyo u Caraboyo.

Bu calway bu slogan “u admo da sohdaydan u şroğo du ağunaydan yo”, mtayıb ramşitho bi mditho Suryoyto d’Bağdede di daşto d’Ninwe, bi cohnutho du yawmo şatonoyo du qtolcamo mahişono d’Simele, udu tewfiqo du camaydan şawco bu yarho d’Ob di şato da 2014 mi daşto d’Ninwe. I ramşithathe dsimo bu salon d’Cammanuel Bunni bu qentrun d’Mor Bulıs di mşablonutho citonoyto, mtaybo mu makıthbo Suryoyo du huyodo gawonoyo da sefre u kothube du Iraq

I hfituthathe dımşarela b’qatinto d’şetqo cali ruho da sohde du camaydan, mdawamle bıthır bu mamlo dsim mu mşalo du makıthbo Suryoyo du huyodo omuro Zuher Bahnam Barda dmırle “07 bu yarho d’Ob, u haylaydan kmaydinale ma faroşe caşine dbızwolın admaye bi qritho d’Simele”.

Bıthır mathe, u rişono du huyodo da sefre uda kothube Suryoye du Iraq Rawand Bulıs bu mamlo dsımle mırle “camıhdode b’haşo ub’marirutho kmathkırina u qtolcamo d’Simele dsımwole u gayso Iraqoyo dkıtwole bu zabnawo mdabronutho folhoyto u folitiqoyto şofinist, ud’nafılwo ebe zıd m’4 alfo sohde dlatwolın htitho. Bebzabno ub’lebo yaqido kmathkırina u yawmo şatonoyo şbicoyo du tewfiqo du camaydan mi mditho d’Mawsal uma fenyothayde di daşto d’Ninwe”.

Bıthır mıdkamili a’mamle, qaşişo Salem Catalla cami gudo du koral d’Mor Afrem mqadamlın qole citonoye Suryoye. Camgabıdathe, 11 omure mu camaydan qrelın mimre mahişone cala qtolcame dsimi mqabıl du camaydan. A’mimrani mqadmi bu leşono Suryoyo u Caraboyo.

Li ramşithathe mıştawtafle u rişono di marcitho d’Mawsal ud’Caqra di cito Kaldoyto hasyo Mor Mixayel Nejib, xuroyo Thabet Habib, qaşişo Salem Catalla, u mdabrono gawonoyo du yulfono Suryoyo Cimad Salem Jajjo, u mcadrono du rişono du huyodo da sefre u kothube Suryoye Akad Murad u menyono ma nahire du camaydan.