Bi mdito d’Kut qdiho i nuro b’nuqazto rabtho d’dukane, mayith holucdo ha u ışti farsufe

KUT, Ciraq — Boğdod qrela l’3 yawme haşo bu athro kule calu yuqdono haroyo dnafıq bu madınho du athro. İ wazirutho di gawoyutho du Cıraq m’akadla, du mınyono da farsufe dımvayaclın a hayathe bu yuqdono dhawi adyawma safrayto bi mdito d’Kut bu madınho du athro, mati l’61 bnaynoşo; beynothaye mınyono celoyo d’neşe u nacime.

Bebzabno kito mınyono d’mithe dheş lo m’akdo i hiyoyuthathe u 14 farsufe hrene mçarhi u maxlaswo hol 45 farsufe. U bınyonano dıkmidıc Corniche, 5 taboqe’yo u kibe dukane u matcıme, heş hatho ftıhwo lu camo. A falohe di Tıffayo cwıdlın ba şoce, hol d’qadiri dmafiti u nuro lu kontrollathe u dmawfıqi a şlade mu bınyono.

İ celtho du yuqdonano heş latyo idıcto, elo lfuth ha sohudo u yuqdono mşarele bıthır mıd generator di hawa mfarqıc. U rişwazire Mohammad al Sudani mawdacle u haşayde u mqadamle buyoye la yaqrotho da mitho u hulmono msarhıbono la mçarhe ubebzabno, huwle’ste amro baroyo dmitabde buhono cali celtho du gedşo.

Bebzabno ğer rişone d’gabe u şutose folitiqoye u tawdithoye; beynothaye Muqtada al Sadır, Cali al Sistani, rişone du qlimo d’Kurditan mawdaclın u haşathe bi sbuthathe. U yuqdonano hawi ha mi şişaltho da yuqdone dnafiqi bu athro ba eşne haroyani. Meqım şato’we dınqılwo hol 100 man abne du camaydan b’mıştutho dsimowa b’Bağdede bıthır mu yuqdono dhawiwo bu salon.