Bi rişitho “u sıbyono du mrodo du Khabur u furqono umthoyaydanyo” MUB frısle buyono bi cohnutho du duxrono şatonoyo da Sohde du mrodo du Khabur

Bi rişitho; u sıbyono du mrodo du Khabur u furqono umthoyaydanyo, kımşare u buyono dfrısle u Mawtbo Umthoyo d’Bethnahrin-MUB bi cohnutho du duxrono şatonoyo da Sohde du mrodo du Khabur. Bu buyono mathkare MUB a Sohdayde dfıdelın a hayathe li sbutho umthoyto du camaydan. Bu buyono i Sictho di Rişonutho kımmo;

U tukoso barbıroyo d’Dacış dkıtyo u bceldbobo di noşutho u da came du Madenho Mescoyo wi maşe da hayle catume u jihadist, mi şato da 2014 wazolo bnişo dsoyım qtolğense bu Iraq u Suriya mafıt li harake. Bıthır mu kboşo d’Mawsal bu siqumo 10 Hziron da 2014, bi şabtho qamayto du yarho d’Ob b’Şigor u bu Daşto d’Ninwe sımle qtolğense cala came Ezidoyo, Suryoyo-Othuroyo-Kaldoyo. U tukoso barbıroyo dı Dacış bıthır mu siqumano wazolo dmafıtle falqo rabo mi gewografiya du Iraq u d’Suriya lidothe, sımle qtolcame u cbode lo doronoye cala came dıkcayşiwo harke, u laşan dlohe a Mşihoye mu qlimo’ste mazıdle a hjomayde. Dilonoyo a came Mşihoyo, Ezidoyo, Kurdoyo dlo qdir dmılhoyi bu Sayfo da 1915 u bğalabe fuqode-fermane u qtolcame, naqla hreto bu doro da 21 bi zihniye u bu cnufyo dı Dacış midi nişo lu tendifo etnikoyo. U tukoso barbıroyo dı Dacış bu yarho dı şbot di şato da 2015 calu camo Othuroyo-Suryoyo dıkcoyış bu qlimo du Khabur du Garbiyo-Madenho d’Suriya mabdele hjomo du lhoyo. Mqabıl du hjomano ba casrowat abne gabore du camaydan mahwelın ha ma mrode rabe du maktabzabnaydan, u bu admaththe u bi nafşaththe kthulın humoso umthoyo. Ba casrowat mharbone mi Hasake, Qamışlo, Derike, Qabre Hewore u mu Khabur dmıdde duktho bu mrodano laşan dımdafci i nafşo, u mal u nushono du camaydan, dbıhlın a hayaththe lu cafraththe u mqadşo.

MUB mırle;

Bu humoso du mrodano maşmacce u mawdacce u strateji di hdoyutho umthoyto di sbuthaydan u du camaydan lı britho kula. A mharbone di hirutho du camaydan u d’Bethnahrin, cama mharbone da came dişe du qlimo huwlın katfo bkatfo, u bu zoyudaththe’ste hol lu buğro haroyo dkıtwolın mdafacce i dukthaththe u luwlın macbartho-fyoto la barbıroye. Ha ma mharbone mşablone du mrodo du Khabur Athro-Tamer Bahde Darwiş bu siqumo 8 Şbot dhawi sohdo maslamle i othayde la mharbone gabore Aram-Jusef Afe, Luey-Julian Osse, Sanharib-Haytham Younan, Ninos-Marios Hermez, George Younan, Alias Darmo, Fuad Younan, George Boulus dhawın sohde bı 23 Şbot, hınne’ste nqilın lu Milad Adam dhawi sohdo 24 Şbot.

Bu huthomo MUB komır;

Adyoma i otho du mrodo umthoyo da sohde du Khabur u da sohdaydan kulle kmirafrıfo ba dukotho dba mowat da mharbonaydan d’MFS, du Sutoro u d’HSNB u ba gbine di msaytronutho d’SDF. U mrodo du Khabur u sıbyono-İrade du sutoro-defoco du ağuno du furqono di umthaydan u du camaydanyo. Bu yawmo şatonoyo da 8 ışne camgabıd dıkmathkırina biqoro a sohdaydan du mrodo du Khabur, kıqorina lu camaydan’ste dnofıq moro lu sıbyono di mardutho du mrodano, du sutorano u lu sabro di hiruthathe.

Nihe lu Humoso Gaboro da Sohdaydan du Mrodo du Khabur. Nihe lu Ağuno du Furqono Umthoyo du Camaydan. Nihe lu Sıbyono du Sutoro du Camaydan bu Khabur.