Bi şato da 2019 hawi rdufyo cal 260 mılyune mşihoye bı britho

U şutoso tawdithoyo d’Port Ovrit dlatyo masro cam şultonutho, mawdacle d’hedor 260 mılyune Mşihoye bı britho hawın nişo l’rdufye qaşye bi şato da 2019.

Lfuth u taşroro dıfrısle u şutosano u Protestanoyo, u menyono da Mşihoye dıqtili bıbritho walaw naqıs i şato dşaficina, elo u menyono dıkmırdofi zayıd lfuth i şato da 2018.

U şutoso Protestanoyo d’Port Ovrit, frısle u taşrorayde u şatonoyo dkibe statistik cala 50 athrawotho dkowın a Mşihoyathe nişo la rdufye qaşye dkulle bıbritho. U statistikano khobış b’gawe a gedşe du qatlo u du cnufyo dhawın cala Mşihoye mu yarho dı Teşrin u Haroyo i şato da 2018 u hol u yarho dı Teşrin u Qadmoyo i şato da 2019.

U şutoso d’Port Ovrit dlatyo masro cam şultonutho, bu taşrorayde dıfrısle u froshezwo d’Frans 24, kımakıd d’hul 260 malyune Mşihoye baynothaye Qatholiqoye, Ortodoksoye, Protestanoye, Macımdone u Ewengeloye u ğer, hzelın rdufye qaşye mqabıl d’245 malyune Mşihoye dıhzewolın cayni rdufye i şato da 2018.

Mbayn da rdufye dıkmisomi cala Mşihoye dı britho, u cnufyo dıkmote lu darğo du qatlo wu dyoşo yawmonoye dkowe u cnufyo ebe noqıstır.

Port Ovrit mawdacla du menyono da Mşihoye dıkmırdofi bıbritho zayıd i şato da 2019, cal di aykanoyutho di hirutho tawdithoyto bu Sin hariwo u mbarbızo l’ğalabe fenyotho, u bebzabno bi netije da jihadist dzayıd u menyonathe bi qıtca d’Afriqya.

Lfuth u taşroro dıfris, u menyono da Mşihoye dıqtili bıbritho i şato da 2019 naqıs l’2983 mqabıl d’4 alfo u 305 farsufe dıqtili i şato da 2018.

U athro d’Nigirya kımdawım dmoyıd i qadmoyutho da nathrawotho dıkmıqtoli ebaye a’Mşihoye mfothıd di haymonuthathe, wu menyono dıqtili bu athrano i şato da 2019 mati l’alfo u 350 farsufe.