Biden mawdacle lıkobe fsoso u İran dwele zayne du nukleer

U rişono hatho d’Amerika dıqmırle a guboye haroye Joe Biden, mawdacle di mdabronuthayde lıkobo fsoso lu İran, dhowele zayne du nukleer.

 Camgabıdathe, i mdabronutho du rişono Amerikoyo Donald Trump, mahıtla tedbire hathe cal Tehran.

 U rişono hatho d’Amerika Jeo Biden, mawdacle di mdabronuthayde lıkobo fsoso lu İran dmote lı darğo dsonıc zayne nukleer u mırle; İ mdabronutho d’ Trump ba fulhone dsımla leşan dgurşo Amerika mu qyomo du nukleer, tfıkla Tehran dımqarwo zıttır lu snoco du zayno du nukleer.

Biden bi maqıblonutho dsımle acme athmıl u froshezwo d’CNN mırleste; Bi harayto dkule, kibi dımarno dlayban dobina fsoso lu İran dhowele zayno du nukleer. Biden dıgrışle u zuhoro calu qedomo d’Amerika la sebwotho di siyase baroyto dgıdhowe ğalabe casqo, mırle; Layban dsaymina u medano lı ruhayna, mawxa ahna sniqoyena dhowina falqo me grub rabtır, leşan dobina u şuqlina lo belhude camu İran, elo cam Rusya, camu Sin uğer.

Camgabıdathe, Amerika mahıtla athmıl tedbire hathe cal farsufe u şutoso İranoyo dıkfulhi bu haqlo du zayno nukleer. Lfuth u tebo dıfrısla i wazirutho di xazina d’Amerika bi dafayda du nawlo, a tedbirani mahti cal grub du şutoso d’Şahid Misami dkıtyo masro cami Mtakasto İranoyto da buhone du sutoro folhoyo, u bebzabno mahıtste tedbire cal farsufo dışme Mahran Babri dkıtyo u mdabrono du şutosano.

Lfuth i xazina Amerikoyto, u grub d’Şahid Misami kmıştawtıf la fulhone du zayno kımyawi. Me gabo hreno u waziro di baroyutho du İran Javad Zarif mawdacle, dkıtne hadire dımşahlıfi a yasire nuxroye dkıtne msike bu İran, mqabıl da İranoye dkıtne ba hbuşye dathrawotho frişe. İran msıkle u hkımle ğalabe farsufe; beynothaye hın dkıtwolın barmothoyutho zawgoyto u dıkmıthomi bi goşuşutho; beynothaye u mbahnono Ahmedreza Djalali dıkhoyewo bu Swed u dıhkim lu mawto mi goşuşutho dsımle la istixbarat d’İsroyel Mossad. U fusqono du şnoqo du farsufano, ucdo mşawhır.