Biden mraşahle Lioyd Austin waziro du sutoro

U rişono hatho d’Amerika Joe Biden, mraşahle u rabhaylawotho  d’Lloyd Austin xıd waziro du sutoro du athro. Dothe u Senato dım’ayıd i mraşhonutho d’Austin, gıdkothıw Biden makthabzabno hatho b’Amerika.

 Dothe Austin dminaqe, gıdhowe u Afriqan komo qamoyo dıkmitahwele i mşalutho d’Pentagon.

U rişono hatho d’Amerika Joe Biden, ruşmoyith mraşahle u rabhaylawotho mşawtıbo d’Lloyd Austin xıd waziro du sutoro du athro. Dothe u Senato dmaqbıl i mraşhonuthathe, gıdhowe Austin u Afriqan komo qamoyo dıkmoyıd i mşalutho d’Pentagon.

Bi maqırhonutho dhuwle Biden mırle; Lloyd Austin, farsufo şariro, folho u rişono qawyo’yo dlıkmıgrış ma casqotho uma krize. Austin, u farsufo dklozamlan’yo ucdo bu maşıqlano. Austin dkıtyo cımre 67 eşne ume Alabama, qayım b’Georgia u bıthır mıd mkamewole u yulfonayde bu Akademi di folhutho, mafıtle ışne yarixe bu gayso.

Masrıh bıthır l’rabhaylawotho u mdabarle a folhe Amerikoye bu Cıraq u b’Afğanistan ba 2010 uhola 2011 bıthır naqla hreto ba 2013 uba 2016 hawiwo mşawtıbo. Hawle’ste dawro rabo xıd ha ma mbaynone du strateji d’Amerika bu qrobo mqabıl da marhıbone d’Dacış.

Mabuce frişe du tbocofroso d’Amerika kımawdıci, di wazirutho du sutoro bu normal kmisomo me farsufe dkıtte dacbar ba fulhone kenşoye. Austin dhawi mşawtıbo ba 2016, klozım dmitahwele diloyutho mu Senato en dothe dmitaqbıl. Lfuth u qonuno d’Amerika-mşalo folhoyo kibe belhude dhowe waziro du sutoro 7 eşne bıthır mıd trele mi folhutho.