Bınyamen Netanyaho hawile lqoyto camu rişono ruhonoyo da Druz Muwafaq Tarif, drışlen i aykanoyutho haroyto d’Sweda
Bu zabno dıkmisım qroytotho dmişadır mcadrınwotho noşoye msarhıbe xdu muklo wa Samone la comure d’Sweda, u rişwazire d’İsroyel Bınyamen Netanyaho bi lqoyto dhawile camu rişono ruhonoyo da Druz Muwafaq Tarif, drışle i aykanoyutho haroyto d’Sweda. Camgabıdathe, Netanyaho bu mamlo dsımle lu froshezwo tlıble dmisım fnitho mşayanto dlo zayno baynothaye Sweda bu taymno d’Suriya.
AL-JALIL, Isroyel — U rişwazire Bınyamen Netanyaho laqi athmıl u rişono ruhonoyo da Druz d’İsroyel şex Muwafaq Tarif bi qritho d’Juls bi fnitho d’Aljalil, b’gawıd di qelayto da cuqobe dilonoye dımşatsolın a’Druz d’İsroyel, bnişo dımtahqıbi i aykanoyutho noşoyto u folhoyto bi hiğmonutho d’Sweda. I lqoytathe athyo luhwoyo bu zabno dıkmisım texmin dmımde qyomo di mşaynutho bayn d’Suriya u İsroyel ba şabe dıbqamuthayna.
Camgabıdathe, u rişono du mawtbo da bote İsarloye bu garbiyo di fnitho di Diffa Macırboyto Yusi Dağan, sımle socurutho lu qentrun di mdabronutho mdinoyto da Druz cali zminutho dımqadmo ele m’şex Tarif. Bi ytawtathe, Dağan sımle qroyto li şultonutho d’İsroyel dmaydo fusqono ruşmoyo laşan dmişadır mcadrınwotho du muklo uda Samone l’Sweda.
Dağan makadle da gedşe mahişone dhawın b’Sweda, kmamtın lu bolo a’gedşe d’7 bu yarho dı Tışrın u Qamoyo di şato da 2023, u mırle “İsroyel klozım dmaydo calruha i mşalutho dıknıflo acla mqabıl du qtolcamo dhawi cala Druz d’Sweda”.
Mxasra hreto, şex Tarif bi ytawtathe makadle calu qento di aykanoyutho noşoyto b’Sweda u mırle “an’ahunonaydan b’Suriya kmaythi mu kafno, ukıtlın i bsirutho du kahrobo, da maye, du muklo uda Samone. Ksaymina qroyto lu kenşo emwothoyo dmıftıh koridor noşoyo laşan dmişadri a’mcadrınwotho. Xdıkmitacbır l’Ğaza 300 kamyone d’mcadrınwotho kul yawmo, sniqoyena dmitahwe fsoso dmitacbır falqo menaye la n’ahunonaydan b’Suriya”.
M’gabo hreno, u rişwazire Netanyaho mawdacle dkobıc dsoyım u taymno d’Suriya baynothaye ste i hiğmonutho d’Sweda fnitho mşayanto dlo zayno, u makadle di şultonuthayde ksaymo ucdo esore u bazare laşan dımşarrıro u nişano.
Netanyaho bu mamlo dsımle lu froshezwo mırle ste “inaqla dfahmina a’gedşe mahişone dhawın b’Sweda şafcina baroyo li harake. Kfılhina ucdo dmıftıh koridor noşoyo udmiqadım snodo baroyo la Druz. Kıdacno towo manyo u dalqublaydan b’Suriya, mawxa ste mırli lu rişono Donald Trumo dıklozım bu şuroyo dmitıstacmıl u haylo, ubıthır mathe kothe u şlomo”.
Putin hule şudoyo dgımdawım u fulhonayde leşan u sutoro da Mşihoye bu Madınho
U rişono d’Rusya Vlademir Putin bi maqırhonutho dhule lu tbocofroso, makadle dkobıc dımdawım bu …
