15/09/2021

Taşdarto mi mdabronutho yothoyto dkımmathlo a came mşahılfe du garbiyo u du madınho d’Suriya mabdela socurutho li mditho d’Mosko

Taşdarto mi mdabronutho yothoyto dkımmathlo a came mşahılfe du garbiyo u du madınho d’Suriya, mabdela socurutho li mditho d’Mosko u kmıntır dhowela ytawyotho cama mşale Rusoye, bnişo dıdırşi i hzayto dkıtla i mdabronutho yothoyto lu dactid folitiqoyo hatho d’Suriya.

Bu tarano ste, u rişono du rejim d’Suriya sımle socurutho lu athro d’Rusya ulaqi u rişqutno Fladimer Putin. u camgabıdathe, hın ma rişone folitiqoye dı Turkiya mawdaclın dlatne mqabıl di tarmitho di mdabronutho yothoyto d’Suriya.

Cali zminutho dımşadrowola i şultonutho d’Mosko, taşdarto mi mdabronutho yothoyto du garbiyo udu madınho d’Suriya, sımla ba yawme dşaficina socurutho lu athro d’Rusya, bnişo dhowela ytawyotho cama mşale di şultonutho, udmıdrış ba ytawyothani u dactid folitiqoyo d’Suriya lfuth i hzayto dkıtla i mdabronutho yothoyto dkımmathlo a’came dıkhoyın bu garbiyo ubu madınho d’Suriya Suryoye, Caraboye u Kurdoye.

İ taşdarto di mdabronutho yothoyto kmişaklo mi rişonitho zawgoyto du mawtbo mşablono du qlimo di Gozarto Nazira Gawriye dkıtyo bebzabno i rişonitho zawgoyto du gabo du Huyodo Suryoyo d’GHS dıkmıştawtıfo la ytawyotho d’Mosko xıd mathlonitho du camo Suryoyo Othuroyo, i rişonitho zawgoyto di sictho mşablonitho du mawtbo d’Suriya demoqratoyto d’MSD İlham Ahmad, wu hadomo di rişonutho d’MSD Sihanok Dibo.

Camgabıdathe, u rişono du rejim d’Suriya Başşar Alasad sımle yawme dı Tre dşaficina socurutho dlıkmıntoro l’Mosko, u yatu camu rişqutno au athro Fladimer Putin, bnişo dmımte l’awyutho ulıfhomo calu maşıqlo folitiqoyo hatho d’Suriya.  Putin bi ytawtathe mhanele Alasad cal dqamırwo ba guboye di rişonutho udqayıthwole ebaye zıd m’95% da qole, ubebzabno mawdacle da haylawotho Rusoye udu rejim ksaymi ucdo u duyoqo d’90% ma n’arcotho d’Suriya bu zabno dkito 25% ma n’arcotho d’Suriya kmidabri ucdo bi morutho da haylawotho d’Suriya demoqratoyto d’QASAD, ukito ste hedor 11% dıkmisım u duyoqaththe ma grube mzayne dkıtne masre cam Turkiya. Putin mawdacle l’Alasad di şkihutho lo ruşmoyto da haylawotho nuxroye bhın fenyotho d’Suriya kımmathlo i tırpılto dkito b’qmuthıd di hdoyutho d’Suriya, cal da haylawotho du rejim bu şıklano laybın dmafiti a’fenyothani lu duyoqaththe. U medano camgabıd dkıtyo egartho l’Başşar Alasad dıklozım dmanhıt katfo li mdabronutho yothoyto uli saqıbloyutho d’Suriya, kımmathıl ste egartho baroyto l’Turkiya dıkmawdıcola d’Rusya bıthır m’Darca kiba dfayto li fnitho d’İdlıb udxılqo eba bulbolo, bnişo dıtıfko a’haylawotho Turkoye mi fnithathe udmadcırolın m’hatho lu athro.

Mxasra hreto, u rişwazire dmeqım dı Turkiya Ahmad Dawudöğlu dkıtyo ucdo u rişono du gabo du Dactid, bi maqırhonutho dhule lu tboco froso, mawdacle dlayto manciye dmisım şıkıl d’federaliye b’Suriya ida da Suryoye, Caraboye u Kurdoye kıbci dsaymi hınne i mdabronutho d’ruhaye, elo b’şart dlım’athro i federaliyaththe udluyo qento cali mşaynutho umthoyto dı Turkiya.

Check Also

USAİD kımdawım d’sonıd u maşıqlo du bnoyo u du hethotho di daşto d’Ninwe

U tukoso Amerikoyo du quyomo Emwothoyo-USAİD, kımdawım d’sonıd u maşıqlo du bnoyo u du het…