Bıthır mi sbutho d’Ayasofya a esore beyn du Yawnan u d’Turkiya mwatın zıttır me meqım

U waziro di zarocutho du Yawnan Makis Voridis bi maqırhonutho dhule calu şuhlofo d’Ayasofya l’masığdo mırle; U bayto d’Ataturk dkıtyo bethcatiqotho, klozım cal xayifo dımşahılfinale l’bethcatiqotho du Sayfo dan 1915.

 Bıthır mi sbutho di cito d’Ayasofya dımşahılfo l’masığdo, a esore beyn du Yawnan u d’Turkiya, kımdawmi dmiwatın zıttır.  

Bıthır mu fusqono dmıdwole u rişqutno Turkoyo Recep Tayip Erdoğan u dımdele di cito catıqto Ayasofya dhuwyo masığdo, kımdawmi dı qoşın a hfuxye mu kenşo Emwothoyo u dilonoyith mu Yawnan mqabıl d’Turkiya.

Bi maqırhonutho dhule u waziro di zarocutho du Yawnan Makis Voridis mırle; Xıd funoyo lu mede dsımla Turkiya, ahnaste cal zabno karyo klozım dımşahılfina u bayto dmawlıd ebe Ataturk dkıtyo b’Tessaluniki, l’bethcatiqotho du qtolğenso dsim calu camo Yawnoyo bu zabno du qrobo qamoyo dı britho.

Bu şuwolo en klozım dmitahwe funoyo l’Turkiya bi sbutho d’Ayasofya, u waziro Makis mırle; Ee, klozım dmitahwe funoyo qaşyo xıdu mede dsımlın a Turkoye.

Klozım dmahwena lı britho, d’Erdoğan nafıq mu qontrol. Me gabo hreno a hfuxye wa maqırhonwotho mqabıl d’Turkiya kımdawmi elo heş lo ha athro, mahıtle klayto mqabıl d’Turkiya u lo mıdle tedbire bi sbuthathe.

Bebzabno u rişono du cılmo Qatholiqoyo Papa Mor Fransis qadmoyo mawdacle u hfuxyo qamoyo du Vatikan bi sbuthathe u mırle; Ğalabe cajızno calu fusqonano dmıdla Turkiya u dkubco dımşahlıfo i cito da Bizantoye Ayasofya l’masığdo.