Brian Hook mawdacle u İran gıdnofıq mu athro d’Suriya

U mathlono dilonoyo d’Amerika dcala sebwotho du İran Brian Hook, mawdacle du cboro du İran l’Suriya, mfarfasle u athrano şariroyith mi xasra du momuno.

 Bebzabno, Hook makadle du kriz du virus d’Corona gıdjobır u İran dnofıq mu athro d’Suriya.

 U mşalo dcala sebwotho du İran bi wazirutho di baroyutho d’Amerika Brian Hook, bi maqırhonutho dhule lu tbocofroso mırle; U İran kıtle ucdo celotho zıd me meqım leşan dgorış a haylawothayde me Suriya. U qrobo d’Suriya trele u İran dmaxır ba milyare dolare. Wu ucdoste u virus d’Corona shıfle u momuno du İran.

 Hook bi maqıblonutho dsımla acme mğaltho Amerikoyto mawdacla, lfuth i hzayto d’Amerika, u İran hulucdo belhude siyase du taktikyo dımaşele bi sbutho du groşo da haylawothayde me Suriya. Wa grube mzayne dıkmısnodi me Tehran, hulın aftho u haylo rabo lu rejim d’Suriya bu hjomayde cali fnitho d’İdlıb.

 Camgabıdathe Hook mawdacle, dıkmıtyaqın d’Rusya u Suriya kıtlın yuthrone ğalabe mu tenqiso du dawro dıkmıştacele u İran bgawe d’Suriya u mırle; Ğalabe athrawotho kıbci ucdo dmınqıl lu maşıqlo dkıtyo bıthır mu qrobo d’Suriya. Wu İran tırpılto’yo qum da dawsat dıklozım dmihalqi lu maşıqlo folitiqoyo hatho.

 Bu huthomo di maqırhonuthayde, u mathlono dilonoyo d’Amerika Brian Hook mawdacle di lhiqutho dkıtwole u İran meqım dsoyım qrobe bu Madınho Mescoyo bu darbo da bnayqyomayde, ba zabne haroyani naqiso u dilonoyith bıthır mıd mayıth zıd me 7 alfo farsufe bu İran mu kewo d’Corona. Wu menyonano da mithe kmıtyaqni a mşale Amerikoye dkıtyo ğalabe cleytır.