Britania u Barrack-Sutoro mdinoye Sweda
I wazirutho di baroyutho dı Britania mawdacla di şalyutho d’Suriya masırtoyo camu tekliyo du qrobo bi hiğmonutho d’Sweda, u makadla ste dıklozım dmisım buqore calu cnufyo b’Sweda udmimıd hşowo ma hayobe. M’gabo hreno, u mathlono Amerikoyo b’Suriya Tomas Barrak mawdacle dhule nuhoro lu rişqutno d’Suriya dmafıt lqul di cayno u idyoloji dkıtlın a’folhe du gayso.
BRITHO / SURIYA — U waziro di baroyutho dı Britania Deved Lami bu mamlo dsımle bu parlamento, makadle di şalyutho d’Suriya hawyo sniqutho rabtho bu maşıqlano ducdo dilonoyith bi sbutho du nfoqo mqabıl di marıhbonutho, udmisım u garanti di şalyutho di fnitho.
Lami dım’akadle dıklozım dmitakle u cnıfyo dkito b’Sweda mırle ste “Britania fgico awkith hawyo şok ma gedşe du cnufyo haroyo dhawın bu taymno d’Suriya udıqtil ebaye menyono celoyo d’mdinoye”.
Lami mırle ste “baroyo mırli lu waziro di baroyutho d’Suriya Ascad Alşebani, ahna kıbcina dkole u qrobo, udmisım u garanti du sutoro da mdinoye uda zedqe da Suriye kulle. A’gunhe du cnufyo d’Sweda klozım dmisım buqore aclaye, udmimıd hşowo ma hayobe”. U waziro di baroyutho dı Britania tlıble ste mi şultonutho dı Darımsuq dnıfqo moro la şudoyayda bi sbutho dmitarku maşıqlo folitiqoyo hatho dıkhobış b’gawe a’came u gawne kulle d’Suriya.
M’gabo hreno, u mathlono Amerikoyo b’Suriya Tomas Barrak mawdacle du darğo du qento b’Suriya ğalabe celoyoyo, u mathkarle ste dhule nuhoro lu rişqutno Ahmad Alşarıc dmafıt lqul di cayno u idyoloji dkıtlın a’folhe du gayso.
Barrak bi maqırhonutho dhule l’Reuters m’Lebnon mırle “huli ste nuhoro lu rişqutno d’Suriya dımnase dqathle mcadronutho qlimoyto di mşaynutho”, u grışle ste u zuhoro cal Darımsuq dıklozım dmıftakro dhuyo zıttır rwihto, inaqla dhuyo i sbutho masırto cami mıştawtfonutho da qalilwotho b’gawıd di şultonutho.
Putin hule şudoyo dgımdawım u fulhonayde leşan u sutoro da Mşihoye bu Madınho
U rişono d’Rusya Vlademir Putin bi maqırhonutho dhule lu tbocofroso, makadle dkobıc dımdawım bu …
