21/02/2023

İ cito da Rom Orthodoksoye d’Hatay b’Turkiya, ftıhla a tarcayda la dıbhe da zalzalat u kımqadmo muklo lban alfyo dıbnaynoşo

İ cito da Rom Orthodoksoye d’Hatay b’Turkiya, ftıhla a tarcayda la dıbhe da zalzalat u kımqadmo muklo lban alfyo dıbnaynoşo. A Mşihoye wa Maşılmone di fnitho, kılaymi bi citathe dkıtyo d’450 eşne catıqto leşan dqathe muklo şahino duxli.

21/02/2023

HATAY, Turkiya – Lfuth i dafo Kurdoyto d’Rudaw, i cito da Rom Orthodoksoye b’Hatay d’Turkiya kısaymo baytoyutho la dıbhe dfayşi dlo bote bıthır ma zalzalat dımhewolın u athro. Bi citathe kmisım 3 danat d’muklo l’5 alfo bnaynoşo dlaw fayışe duktho du fyoşo.

Mınyono d’dıbhe Mşihoye u Maşılmone, kıfayşi ucdo bi citathe dkıtyo 450 eşne catıqto. Gawonoyith b’İskenderun mawdıc, d’mınyono celoyo d’citotho u masığde shifi uğer’ste hzelın husrono rabo. Leşan u snodo du camo’ste, mınyono d’Mşihoye d’Stanbul, Bodrum uğer nahiti l’Hatay leşan dımcadri a sniqoye.

Wu mşalo mu waqıf di cito Çan Teymur mawdacle, dmu yawmo qamoyo di zalzale uholucdo, kımbaşli muklo bi durto di cito la dıbhe. Nqil bebzabno mcadronwotho me ğer dukotho l’Hatay, bnişo dqudri dımdawmi dsaymi muklo lu camo

Bi mdito d’İskenderun’ste ftıhla i cito da Rom Orthodoksoye a tarcayda lu camo-lo lbelhude a Mşihoye elo la came hrene di mdito. Bu snodano dıkmitahwe hem la Mşihoye u hemste la Maşılmone, mathlo towo da haye mşawtıfe dbeyn da 2 tawdiyotho’yo.