MUB: 8 Odor u sıbyono hiro di athtoyo

BETHNAHRİN – Bu yawmano d’8 Odor, u Mawtbo Umthoyo d’Bethnahrin-MUB khıd kul şato mathkarle u ağuno dkobın a neşe hadımyothayde leşan i hirutho wi şawyutho bgawıd du kenşo. Bu buyonano dıfrısla i Sictho di Rişonutho d’MUB kımmo; u yawmo da Neşe Tacobe dı Britho 8 Odor, u siqumo mramrımono du ağuno dhiw mqabıl di mıştacmronutho barbıroyto’yo. U halkho du furqono udi hirutho dımşarele bu doro da 19 bu nuhomo da tacobe, hol adyawma kımdawım dmanhır u darbo da neşe uda came dişe.   

Bu doro da 21 i athto du camaydanste, hawyo siyasi, mtakso, mbayanla u sıbyonayda di mşablonutho lu ağuno di hirutho umthoyto. A neşe du camaydan b’Bethnahrin ubi golutho, camgabe dıkmaclın u qolathe, kmaqwın u sabro du qmoro uda talabathe, kmawdıciste i hiyoyuthathe i umthoyto wi catirutho makthabzabnoyto u marduthoyto dkıtte lı britho. Cami athto u gawro, u camaydan inaqla dımşawşıt u ağunayde, gıdımşawşıt a timoyotho demoqratoye wi falsafe hırto di cyeşe.   

İ Sictho di Rişonutho d’MUB kmawdıco; u Mawtbo Umthoyo d’Bethnahrin xıd kobe ağuno leşan di hdoyutho da falqe, da ışmone uda mathhabe, kımdafıcste u dawro asasi dkıtla i athto bu ağunano. Camgabıdathe a neşe leşan dfayti a casqotho dıkloqın, more dnuhomo, tacbo u idactho celoytone. Bu maktabzabno du camaydan ğalabe neşe rişone ba şuşote kenşoye mamtelın i mşaluthathe li duktho u mıştacelın dawro şuşotoyo. Bu doro da 21 u Huyodo da Neşe d’Bethnahrin’ste, bu haylo tukosoyayde mati ldarğo mbaynono bu ağuno umthoyo du camaydan.   

Calathe bu ağuno dkobe ımawlıf la falqe kulle, i mardutho du mrodo mqabıl di siyase du tenkiro udi zihniye da hbose feodal. Bi rişonutho du MUB u şuşoto dhawi ba prensibe di falsafe di hirutho udi cyeşe b’nushono, ktore u camaydan dloqe ba timoyotho demoqratoye u doronoye, u leşan dmakhlıs u Madenho Mescoyo ma zıhniyat catume, kmoyıd duktho ba ağune dıkmitahwın. A tukose da neşe dkıtne bu zoyudo more dfusqono bu ağunano, ksaymi rişonutho la renye kenşoye uli cyeşe du qawmo du doraydan u kımşahlıfi i brithaydan.   

Bu huthomo MUB mırle; Kımcaydina u cedo da neşe kulle dıkmaydi haylo mu makthabzabno du yawmo da Neşe Tacobe dı Britho 8 Odor.   

• Nihe lu ağuno di hirutho di athto Suryoyto-Othuroyto-Kaldoyto-Oromoyto.  
• Nihe li hdoyutho uli awyutho da neşe tacobe dbritho.  
• Nihe lu ağuno di hirutho dıkmitahwe bi rişonutho du Mawtbo Umthoyo d’Bethnahrin.