Bu gunho du kyono dhawi b’Nigeria, mvayaclın 150 bnaynoşo a hayathe

NİGERİA – U camo faqiro d’Nigeria dkıtyo bi qıtca d’Afriqya, me yawme d’Arbco dşafıcina kımdawmi a mattre dnuhti dlo kıloyo bu athro u hawi arğalyotho dınqilın kull mede dathi bu darbathe cam ruhaye. Bu gunhano du kyono, mvayaclın 151 bnaynoşo a hayathe. U mınyonano’ste kito zuctho heş dımdawım dcole.

Camani u nahro d’Niger mawbele camruhe 265 bote wu 3 alfo bnaynoşo’ste jbiri dmahzımi ma dukothathe. Camu husronano dhawi, a falohe di mcadronutho msarhabto kımnasın dmaxlısi a haye da bnaynoşo. U rişono d’Nigeria Bola Tinubu mqadamle a buyoayde la yaqrotho da mithe u mşadarle a hayle di mşaynutho leşan dımcadri bu kroxo.

U şutoso dıkhoyır cali hawa, grışle u zuhoro du camo dkito qento da mattrani dımdawmi kmo yawme hrene u tlıble menaye dmaydi a tedbirathe. A mattrani dıknuhti bu zabnano, mede kyonoyo’yo l’Nigerika u kımdawmi zabno d’6 yarhe.

Cama mattrani’ste kmıxloqi a kewe u korıw u bınyono tahtoyo du athro. Ba eşne haroyani zayidi an arğalyothani mcal fothe du şuhlofo du muzoğo wu meqım şato, mvayacwolın 1.200 bnaynoşo a hayathe uhol 2 milyone dıbnaynoşo mahzamwolın ba dukothathe.