Bu hçomo zeynoyo dsim bu athro d’Thailand qtil 26 farsufe

Folho bu athro d’Thailand hjımle bu zayno calu camo di mditho d’Korat u qtile 26 farsufe u mçarahle 57 hrene.

 Meqım mu hçomano dsim calu camo bı duktho dkito eba ğalabe dukane, qtiwole u hayobo ha rabhaylawotho u 2 folhe hrene bı foqudutho du gayso.

Athmıl casriye, sim hçomo barbroyo bi mditho d’Korat dıknuflo bu garbay madınho di arişkoyto d’Thailand Bangkok. Mawdıc du hayobo marısle buğre bu zaynayde calu camo dkıtwe bu sentrun da dukane. U hayobo dmawdıco i hiyoyuthayde bu tbocofroso udı ışme Jakrapanth Thomma, msıkwole’ste 8 farsufe yasire.

U polis sxırle u sentrumano kule u gayso mşadarle folhe li duktho leşan dsoyım cuqobe u dmosık u hayobo. Bi netiçe nafıq taxtuşe qaşye beynothaye. Bu hçomano dsim, mawdıc dı qtil 26 farsufe u 57 hrene mçarhi u heş kito 21 menaye bi bethkrihe. Bu zabno da hçomani’ste, mahıtle u hayobo hezwone bi dafo du facebook.

Bıthır ba şoce du lalyo, maxlısi a yasire u qtil u hayobo. Mawdıc’ste, du hayobo qtiwole bi qamayto ha rabhaylawotho u 2 folhe bı foqudutho du gayso, u mahzamle me tamo bı radoyto. Bu zabno du qlocayde li şuqoste, marısle buğre ba farsufe dkıtwın şafoce. Lfuth u polis i celtho du hjomano, u hayobo hzele dsim hile acle cal qyomo dfalqo d’arco.