Qoyumo Tuma Çelik cam taşdarto mdu cameydan sımme socurutho lı Dayroyo Aho Bilecen

Taşdarto bi rişonutho du qoyumo du cameydan bu parlemento d’Turkiya Tuma Çelik sımla socurutho l’Abun dayroyo Aho Bilecan dımsıkwo me Turkiya u marfewo bu hboso dhawiwo cal Turkiya.

Bi itawto dhawi camu dayroyo mqadamle tawdiyotho lkul man dhawi mcdarono bu terfiyeyde elo heş u bethdino gımdawım.

Abuna dayroyo Aho dımsıkwo mu taraf di şıltonutho d’Turkiya u bıthır 4 yawme marfewo mi celtho du hboso dsımle u camo Suryoyo-Othuroyo bkul duktho.

U qoyumo Tuma Çelik cama mathlone du federasyon da hudre Suryoye SUDEF, u mgabyo di qritho d’Kafro Aziz Demir, u mgabyo di qritho du Sedari Hanna Akbaba, mathlone mu hudro d’Arkah mi golutho u mu athro Gawriye Çil, u İbrahim Ay u Marawge Çınar mu hudro d’Kafro İsrayel Demir sımlın socurutho li dayro d’Mor Yahkub d’Qarno laşan dımhanın dayroyo Aho Bilecan dmarfewo meqım me zabno mu hbuşyo.

Bi socuruthathe mşayıl calu zabno du dayroyo dkıtwe bu hbuşyo u mhanelınste dmarfe bzabno karyo, elo heş u bethdino dkıtle gımdawım.

Bu mamlo dsımle abuna dayroyo Aho mqadamle tawdiyotho lkul man dhawi sanodo bu terfiyeyde u mırle i awyutho dmahwele u cameydi bi sbuthathe hulali moral rabo, metul dbu zabno dkıtweyno msiko lo mıftakarweyno bruhi elo mıftakarweyno u cameydi aydarbo mıstaqbele i sbuthathe, elo fsihoyono du cameydi mıstaqblole btawutho u lo trela tathir lo tawo acle.

Bu huthomo du droşo u qoyumo Tuma Çelik cal ışme di taşdarto tlıble kaşirutho ba fulhone dkıtle bi dayro u mırle hın kul zabno gıdnıfqi mqabıl di lo kinutho dhowe calu cameydan.