Bu slogan u “Konferans du Mrodo”, u Mawtbo Umthoyo d’Bethnahrin sımle u Knuşyayde u şatonoyo

BETH NAHRIN – U Mawtbo Umthoyo d’Bethnahrin ba melani kımşare lu buyono du huthomo du konferans dsımle “bi rişonutho d’Sohıthto Hwartho İzla dkıtyo u remzo du mrodo du ağunaydan, uda sohdaydan du ağuno kulle, ubu darbo dıkmabhırile sımle u konferansayde u şatonoyo.” Lu konferansano dsim 1 bu yarho d’Hzirın mıştawtafle 120 hadome di Sictho Mdabronitho ma wahde d’Suriya, Lebnon, Iraq, Turkiya u Urifi, qrın a taşrore wa tahrazyotho da şutose qentrunoye uda wahde u sim u nuholaththe.

U Rişono Gawonoyo Mixayel Naim Hadodo bu mamlo dsımle mnahele u maşıqlo, u mahıtle bi holo perspektif rwiho. Mbayni a dawsat dıklozım dmihalqi leşan di hdoyutho umthoyto ulu statü folitiqoyo du camaydan. Kali cala fırsat wa tahlukat dkothın cami aykanoyutho folitiqoyto wa krize, m’bayanle i şrolutho dkito, wi mşalutho wa wolyotho dıknıfli calu ağuno. Grışle u zuhoro; u mrodo dhule MUB hani 40 ışne b’fedekariye u badale rabe, trele tathir bu qlimo.

Ba melani kmidawım lu buyono: “Ba şartat du qrobo Tlithoyo dı Britho dıkmicış bu qlimaydan, u camaydan dmahwele mrodo bi hiyoyuthayde, ubu sıbyonayde u umthoyo, athi lu yawmoyo. Calathe u şuşotano, i netije du ağunaydan udu tacbaydanyo. Bkul falqo du athraydan ubi golutho kwena sohude dımşawşıto u dzayido i ruho di hdoyutho umthoyto, i idactho folitiqoyto, i mardutho du snodo, wi hubo di masirutho bu athro da abohotho. Hawi qerowo beyn da tukose, şutose du camaydan, u mşarele u maşıqlo dlıtmi hedor d’nişe mşawtıfe. A şuşote du qlimaydan wa xaritat dıkmıbce dmırşomi me hatho, tfıkke u camaydanste dkorıx cal şuryono msimono leşan da zedqayde. Ocdo laqina fotho b’fotho bi şrolutho dbena u funoyo li mezaltathe b’rişonutho dkıtyo snıdto lu fusqono kamilo, li lbibutho, uli fedekariye.

Leşan dmaydina duktho bi hiyoyuthaydan bu Madınho Mıscoyo hatho, b’nişo dımşahlıfina a şartat, a fırsat wa mkone dıknıfqi li holo; lı qmore, kımhalqina dawsat b’fusqono kamilo. Bu yawmo şatonoyo di mşatsonutho da 25 ışne du Mawtbo Umthoyo d’Bethnahrin kmınfıq moro li yortutho folitiqoyto, tukosoyto, umthoyto, ula nesyune du dacbar, kmitahwe perspektif hatho leşan du dactith, twir falqo rabo ma tabuye catiqe. Bu şıkılano u enerji du camaydan hawi haylo mşawtıfo leşan da nişaydan a umthoye.

Ahnaste xıd ağuno u camo, b’nişo dwena hadire l’kul şıkıl süpriz ula natayıj dnıqfi li holo bu maşıqlo dıbqamuthayna, gıdmamtena li duktho u dawro makthabzabnoyo u di rişutho kenşoyto dkıtlan. Midıd u bınyono folitiqoyo du qlimaydan kmişakıl me hatho, ahna kımdafcıina cal sistem demoqratikoyo, sküler u sagiyonoyo du camaydan dkibe dcoyış b’hirutho ebe, u dqodır dımmathıl i hiyoyuthayda.”

Hın ma fusqone dmidi bu konferans di şato hanine; laşan dmimodi a zedqe folitiqoye, marduthoye, acmayye u yulfono du leşono emhoyo wa zedqe dkıtle u camaydan kulle tahtu garanti du nomuso esonoyo d’Suriya i hathto dımşaklo, dmihaydır  tahrazyotho u dmitafiti la haye. Laşan da fulhone di hdoyutho umthoyto, dmihaydır tahrazyotho mşawtıfe cama şutose u tukose du camaydan u dmitafiti la haye.