Menyono Mşihoye Urişlem mati l’1%

Kul dkothe i zuctho dıkcayşole i cito ba n’arcotho mqadşe kzaydo, mi celtho dnaqıs u menyono da Mşihoye d’Urışlem l’1% bıthır mıdkıtwe u menyonaththe 25% bi şato da na’1922. U menyono da Mşihoye b’duktho mhaddıde naqıs ba n’arcotho mqadşe, xdu qlimo di Diffa Macırboyto, u qlimo d’Ğazza wi mditho madınhoyto catıqto d’Urışlem.

U malolo du mawtbo da rişone da citotho Qatholiqoye ba n’arcotho mqadşe Wadic Abu Nassar, mawdacle da Mşihoye naqıs u menyonaththe mi celtho du hboso momunoyo, mi celtho dlıkmahwe dkito cufqo lu şroyo folitiqoyo, ubebzabno mi celtho da tedbire İsarloye.

Abu Nassar bi maqırhonutho dhule li sferyawmo du Cılmo Caraboyo, mırle “layto keşlo şek da casquwotho kzaydi mkul xasra, ham mi xasra momunoyto dlatyo mathınhonitho, ubıthır ste athi u kriz d’Corona, mawxa ste lıffayış kothe socure nuxroye l’Urışlem, l’Bethılhem uli mditho d’Nosrath Alnasira. Camgabıdathe, i aykanoyutho folitiqoyto azıltoyo lafi cıtmo, layto lo maşılqo du şlomo uloste cufqo du şroyo, ubu şıklano kito mede xdu qatmo b’qamuthıd du dactid dıkmazıc ğalabe noşe Mşihoye ulo Mşihoye ste”.

Camgabıdathe, Abu Nassar mawdacle ste bu zabno dluyo i aykanoyutho tawto, a’qalilwotho umthoye u tawdithoye kowın i halıqto mhilto dkulle du kenşo. U mathkarle du medano latyo i mıcnayde da qalilwotho kowın nişo l’hçome, elo ilothnihuthathe ktıryo kul naqla a’qalilwothani dmıftakri bi golutho.

Lfuth statistike İsarloye dlatne ruşmoye, u menyono da comure d’Urışlem i madınhoyto u macırboyto bi şato da 2019, kmotewo l’936 alfo farsufe, baynothaye 577 alfo Yudoye wın u 358 alfo Fleştoye wın.

Lfuth Wadic Abu Nassar, noqıs m’10 alfo farsufe ma comure Fleştoye d’Urışlem Mşihoye ne. Abu Nassar mawdacle ste dkito bayn 130 hul 140 alfo Mşihoye Fleştoye b’İsroyel, elo bi Diffa Macırboyto ubu qlimo d’Ğazza kito 40 alfo Mşihoye.