Centcom mzaharle mu tukoso marıhbono dı Dacış dkımdawım dımşakıl tehdid çıddi b’gawıd d’Suriya

WASHINGTON – U tahlufo du rişono du haylo Amerikoyo du yamo Brad Cooper, makadle dı Dacış kımdawım dımşakıl tehdid çıddi u şariro b’Suriya, ubebzabno makadle dıklozım dfoyış haylo folhoyo Amerikoyo walaw ste dhowe mhaddıdo b’gawıd d’Suriya, cal dkıtyo u medano ulsoyo lu dewam da fulhone mqabıl di marıhbonutho. 

Cooper dkıtyo mraşho laşan di rişonutho di mdabronutho qentrunoyto d’Amerika d’Centcom, bu mamlo dsımle bu mawtbo da senatore d’Amerika mırle “adyawma i şkihutho folhoyo d’Amerika ulsoytoyo laşan di wolitho du nfoqo mqabıl dı Dacış dfayto la haye. I wolithathe bi rişonuthaydan kmisomo ucdo, ubu dactidste gdımdawmina dmaydina i rişonutho”. 

Cooper mawdacle ste da haylawotho Amerikoye heş kımdawmi dsındi a’haylawotho d’Suriya demoqratoyto d’QASAD dımcadarlın bu qşoco dı Dacış bi şato da 2019, udıkfılhi ucdo laşan dlıdocır u tukosano m’hatho la haye. 

Cooper dımzaharle mu dewam du şğyşyo udi mwatyutho bayn da madhhabe d’Suriya, grışle ste u zuhoro cala hçome barbroye qaşye dsimiwo cala Calawiye bu macırbo d’Suriya bu yarho d’Odor dşaficina, ubebzabno mzaharle m’Dacış dlımıstacmıl i mwatyuthathe laşan dmadcır i methtaksonutho d’ruhe. 

Camgabıdathe, Cooper grışle u zuhoro calu furqoco marıhbono qtolnafşoyo dhawi bi cito d’Mor Alyas bı Darımsuq udnafıl ebe 25 sohde, udımçarıh ba casrowat hrene, u matcanle Dacış i mşalutho du furqoco u mırle “Dacış heş kımmathıl tehdid, u gdımdawamno dkoleno cali sbuthathe, cal dkıtyo bi qadmoyutho di tahraztaydi”.