Christian Broadcasting Company grışle u zuhoro cala Mşihoye ucala qalilotho hrene d’Suriya

SURIYA – U kanal du froshezwo Mşihoyo-The Christian Broadcasting Network-CBN dkıtyo u qentrunayde b’Virginia d’Amerika, frışle duktho bu frosayde cali aykanoyutho da Mşihoye uda qalilotho tawdithoye d’Suriya u mşadarle u gelyunorayde Chuck Holton dımcaqıb i sbuthathe me qariwo. Bu şuroyo u gelyunoro kımawdıc di şultonutho d’Trump grışla u zuhoro calu qento dkibe cal qariwo dqoşe naqla hreto u qrobo gawoyo d’Suriya.

İ hzaytathe grışwole’ste u waziro di baroyutho d’Amerika Marco Rubio acla u dmawdacwole, dkito qento rabo dmıshofo i şultonuthathe u dnofıq qrobo qşeytır mu mede dkıtwo holucdo. Bi socuruthathe’ste lfuth u gelyunoro, u qrobo hatho mşarele’ste-u kımahke cala taxtuşe dıkmdawmi b’dukotho mşahılfotho d’Suriya beyn da hayle d’QASAD uda noqufe d’Turkiya, bu zabno du rejim hatho dkıtyo bi rişonutho d’mşalo catiqo d’Al Qacida, kımnase dımhayıd u athro.

U gelyunoro şafıc lu masxoro d’Teşrin u hzele a taxtuşe qaşye dhawın beyn dhın ma noqufe d’Turkiya uda hayle d’Darımsuq bu zabno d’SDF kımnase dım’amın u masxorano mu shofo u dımhalxi lfuth i şalyuthzayno dımbayno. Elo a noqufe d’Turkiya lıkmtambqi u qyomano u kımdawmi a hçomathe yawmoyith. A mhoyani m’akdiste ma hayle mıstabyone d’The Free Burma Rangers dkıtne bu qlimo.

U gelyunoro d’CBN laqi’ste Aram Hanna dkıtyo mu Mawtbo Folhoyo Suryoyo-MFS sımle nuholo u maşıqlo haroyo wa hçome dıkmdawmi b’Suriya u d’mede ğalabe lo mşahlıf bıthır mi şultonutho hathto u mırle; A hayle d’HTŞ u a hayle du rejim d’al Asad u acmaye’ste a hayle noqufe d’Turkiya wa folhe Turkoye’ste kımdawmi a hçomathe uhol dıkmdawmi a mhoyani, ahna layban dtorina mu zayno. Hano u athraydan’yo u ahna gıdmdawmina u ağonaydan xıd came frişe d’Suriya- Suryoye, Armınoye, Kurdoye u Caraboye.

Free Burma Ranger’ste grışle u zuhoro du kenşo Emwothoyo, calu snodo dıklozım la Mşihoye, la Ezidoye u qalilotho hrene kulle d’Suriya leşan dlo mıqtoli elo dhoyın b’şlomo ba dukothathe. U şutosano mawdacle’ste, d’Woşington lıklozım dgurşo ucdo a folhayda mu athro, hol da came d’Suriya dqudri dşorın a qetrathe. U fyoşo d’Amerika kobe’ste aftho la Mşihoye, Kurdoye ula came hrene dımdawmi dfulhi camhıdode ba dukotho dkıtne bu duyoqo da hayle d’QASAD.