CIRAQ: U koalisyon Emwothoyo dkobe ağono mqabıl d’Dacış grışle u zuhoro cala hçome du tukoso marhıbono

Brandon Parker dkıtyo u mşalo da falohe du koalisyon Emwothoyo bu Cıraq sim maqıblonutho acme mi dafo d’Al Hurra bi sbutho du ağono dkobe u koalisyon Emwothoyo dkıtyo bi rişonutho d’Amerika mqabıl d’Dacış. Bu mamlayde Parker, grışle dilonoyith u zuhoro cala marhıbone wu qento dıkmşakli ba hbuşye du Cıraq-dilonoyith ba hbuşye dkıtte mdabronwotho dhacif.

Lfuth Parker, a marhıbone mazıdlın i harakathe wa hçomathe bıgawe da hbuşye u m’akadle, du koalisyon Emwothoyo kımdawım dfolıh cami şultonutho ucama hayle folhoye du athro bnişo dmadhcıfi u haylo da marhıbone-elo camathe kula’ste, heş naqla hreto kımşakli qento rabo.

Brandon Parker mawdacle, da rdufye dcala hbuşye falqo du plan d’Dacış’yo leşan dmahrıw i mşaynutho du athro u cal da mdabronwotho da hbuşye dhacif’ne u dlayto ğer ğrobe dkibın dmaklın a marhıbone, kımazidi u qento da hçome bu Cıraq.

Bi sbuthathe griş u zuhoro calu hçomo dsımwola krılto d’Dacış calu hbuşyo di Hasake b’Suriya dkıtwo ebe ban alfayo d’marhıbone wa taxtuşe dhawınwo bıthır cama Haylawotho d’Suriya Demoqratoyto dqadir bi harayto naqla hreto dmoyıd u kontrollayde.

Elo bi netiçe’ste mahzamwole mınyono celoyo d’marhıbone mu hbuşyo. Parker m’akadle dgımdawmi u snodathe l’Boğdod hol dkito sniqutho u talab mena, bnişo dmi’amni a mdinoye ba dukotho dmidi mu tukoso marhıbono ba 2017.