Claymo Suryoyo Thomas Atak qtil b’Ahlen b’Almanya

Claymo man abne du camaydan dıkhoyewo b’Almanya, qtil athmıl ba şoce d’casriye qum du bayto di emo u babayde bi mditho d’Ahlen.

 U claymo Thomas Atak dkıtwe 34 eşne, qtil bu buğro dımhe b’rişe me farsufo dheş latyo idicto i hiyoyuthayde.

Thomas Atak mawladwo 7 bu yarho d’Teşrin u qamoyo dan 1986 wu abro d’Fehmi Atak dkıtyo mi qritho d’Bsorino d’Turabdin. U mhasyo du Thomas, axile athmıl bi şoctho da 10 buğro du zayno b’rişe uma çurhe yaqure dhawın, mvayacle a hayayde qum du tarco du bayto di emo u babayde dıkhoyın b’Ahlen d’Almanya.

U polis Almanoyo bıthır mıd matile xabro, şafıci li duktho u sxırle a darbone elo u hayobo mahzamwoleste me tamo. Lfuth u polis, heş layto mawdconutho qrıhto cali celtho du qatlo du Thomas u loste calu farsufo dqtile wu calathe mşakıl sictho dilonoyto leşan dsaymo buhone calu qatlano du Thomas.

İ sictho bıthır gıdmawdıco i netiçe da buhonayda lu polis uli iqartho du mhasyo.

Hiw bıthır u tebo mayiro li iqartho du mhasyo ulu kohno di cito d’Mor Yuhanun-abuna Petrus Kaya, dmawdacle u haşo rabo dhawilın calu qatlo du Thomas, dkıtwe hadomo bu mawtbo di cito.